Diahuebs a tuma luga e final di Copa Betico Croes. E dos teamnan cu a topa den e final tabata Deportivo Nacional y Dakota, di cual e team di Noord a sa di titula campeon. Faltando seis minuut di wega Devis Oliveros a anota un pinalti. Asina ey e wega a termina 2-0 pa Deportivo Nacional.
Devis Oliveros, capitan di Deportivo Nacional, a indica cu desde comienso di januari nan a cuminsa train duro, haciendo sacrificio y tabata train tres bes pa siman. E Copa aki tabata di Nacional, p’esey nan a haci e sacrificio y a gana e wega di miho manera. E team ta di 25 hungado y si un no ta presente, tin otro.
E wega a termina 2-0 cu gol anota pa J. Gongo y Devis Oliveros mes. El a expresa cu Nacional ta un team cu ta custumbra yega final, hopi sacrificio, hopi humildad, tur ta tira pa mesun banda. Nan a logra e obhetivo di gana Copa Betico Croes.
E fanaticada di Noord semper t’eynan pa apoya nan. E triunfo aki ta pa e fanaticada y e trofeo ta keda Noord.
Randolf Lacle, presidente AVB, a indica cu e final tabata uno tremendo entre dos team cu a sa di hunga un bon futbol. Esey a pone cu ambos team a yega e final. El a manda pabien p’e team di Nacional cu a gana nan prome titulo campeon di Copa Betico Croes y Dakota pa ta subcampeon.
E wega tabata uno bon, ambos team por a bay cu e titulo. Tur hende sa cu den futbol esun cu hinca gol ta gana y di cual Nacional a haci esey pa bira campeon di Copa 2023/2024.
Durante wega basta carchi geel a cay y segun Lacle, esey por ta parti di emocion di wega, unda cu cansancio a hunga un rol, e tension tabata halto. Esey ta parti di futbol, unda carchi ta cay. Di otro banda e fanatico cu ta mira e hugada innecesario.
Den luna di october e weganan di Copa Betico Croes a inicia. E teamnan di Division Uno a hunga den diferente grupo, esta cuater grupo. Di cual e ganadonan di e gruponan a clasifica. A hunga dos wega y di cual e dos ganadonan a join e dies teamnan di Division Honor. Na januari a cuminsa cu e weganan di diesseis team, unda a hunga e weganan di kwart final, semifinal y final.
Pa mas lesa TREMPAN.COM.
