Departamento di Enseñansa Aruba (DEA) ta invita tur studiante di enseñansa secundario y universitario pa participa na e Virtual fair di EducationUSA. Bo soño pa studia na Merca por cuminsa aki.
Por medio di un feria educativo virtual completamente gratis, studiante y profesionalnan na Aruba tambe lo tin acceso na oportunidad pa enseñansa avansa na Merca.
EducationUSA den colaboracion cu Departamento di Estado y Embahada di Merca ta invita studiante di enseñansa secundario y universitario como tambe profesional di diferente area di trabou pa participa na e tercer edicion di EducationUSA Virtual Fair.
E feria virtual ta un evento gratis unda lo ricibi informacion for di 80 diferente instituto di enseñansa avansa (Colleges y Universities) na Merca.
Den un ambiente completamente virtual, participante ta ricibi acceso na varios espacio unda lo brinda diferente tipo di informacion. Por ehempel, na e auditiorium por encontra diferente sesion en bibo ‘live sessions’ y esunnan a base di peticion ‘on-demand’ riba topico di relevancia pa cada participante.
Na e Exhibit Hall, lo tin stand virtual di e diferente institucion na unda cu e studiante por chat cu representante di cada organisacion y tambe cu e conseheronan di EducationUSA.
Banda di e aspecto educativo, lo tin espacio interactivo manera un Photobooth y un Leaderboard unda cu pa diferente actividad riba e Fair Platform e participantenan ta ricibi punto.
Durante e feria virtual, e participantenan lo ricibi tur informacion corecto, comprensivo y actual tocante e proceso di aplicacion, rekisito y sosten financiero pa studia na Merca.
Registra
E evento online pa nos region ta tuma luga diaranson, 24 augustus di 4:00 di atardi pa 7:00 di anochi.
Por registra pa e feria na e siguiente link: bit.ly/EDUSAFair. Por haya mas informacion y e link tambe riba website di Departamento di Enseñansa Aruba ww.ea.aw.
EducationUSA
EducationUSA ta un red di e Departamento di Estado di Merca. E red ta consisti di mas cu 430 centro y nan ta estableci na mas cu 175 pais y teritorio globalmente.
E centronan ta brinda informacion y conseho p’e studiantenan cu ta biba pafo di Merca. EducationUSA ta promove enseñansa avansa na Merca na studiantenan den exterior, incluyendo Aruba, door di brinda informacion corecto, comprensivo y actual tocante oportunidadnan existente pa studia na institucionnan universitario acredita na Merca.
Mas informacion
Pa mas informacion por acudi na Facebook page facebook.com/EducationUSAAruba. Pa mas informacion relaciona cu Arubalening pa studia na Merca por acudi na website di Departamento di Enseñansa Aruba ww.ea.aw y busca Arubalening (Portal) na letter A den e alfabet menu. Tambe ta sugeri studiantenan pa sigui Departamento di Enseñansa Aruba riba Facebook y/of Instagram @EducationAruba pa keda na altura di tur informacion.
