Denzel Browne ta su nomber pero hopi conoce p’e nomber artistico “Kulchaman”. Na 2019 el haci su debut den e mundo di musica na momento cu pa prome biaha el a participa den e Caiso y Soca Monarch aki na Aruba. Su talento a pone cu el a clasifica pa final.
E mesun aña ey el a participa den e Europe United Kingdom “EUK” Soca Monarch cu su cancion titula “A Wha Do Dem” y logra sali na di cuater luga. Como finalista e tabatin e oportunidad pa participa den e UK Unsigned, den e competencia aki el a logra bay cu e titulo di campeon pa e categoria di soca. Denzel ta e prome pa gana den e categoria aki.
Despues di e pandemia a logra organisa e EUK Soca Monarch 2022. Denzel a dicidi cu e lo participa cu su ultimo release titula “Melanin”. Browne ta conta cu el a tuma nota cu e cantica como tambe e videoclip a haya bon acogida y a sinti cu e por a bay mas leu cu ne.
El a logra train y prepara su team. Su team a consisti di dos bailarina cu ta Janirey Severino y Jaimerlee de Meza. Alabes su amigonan Silvion Pardo y Erwin Hughes a compañ’e p’asina zorg p’e preparacionnan y grabacion di e presentacion tabata “on point”. Denzel a logra e titulo di campeon pa cu e EUK Soca Monarch, e competencia a tuma luga na South Hampton.
Areglo di e cancion tabata den man di Nigel Hoek “Suhcy” y composicion tabata den man di Denzel Browne. Nan a release “Melanin” bou di Palms Up Records y published pa Sony Music Atv. “Kulchaman” ta gradici Aruba completo y tur hende rond mundo cu a sa di vota p’e y asina yud’e yega den e final. E ta conta cu e sosten di tur hende a motiv’e y dun’e curashi pa bay te final. Denzel a expresa cu “Mi ta dedica e titulo aki na mi omo Roberto Geerman d.f.m. cu semper a sa di kere den mi y pusha mi te na unda cu e tabata por.”
Denzel ta gradicido na su famia pa nan sosten di semper. Na mes momento e ta gradici Dios pa e talento cu el a dun’e, tambe pa su guia riba e caminda cu el a scoge pa cana.
Pa Denzel Browne e ta un honor pa representa Aruba na un manera internacional y e lo sigui pusha pa asina sigui carga Aruba riba su lomba unda cu e bay.
“I’m just an Uptown Youth With Big Dreams! Never give up on your Talent!! The World is waiting on you!. Go for it.!”, Denzel a finalisa bisando.
