Rocco Beach Tours, Bushiri Karting y El Mexicano Restaurant ta tres establecimento cu ta sufri pa no tin un bon entrada. Cada dia e ta bira mas fastioso pa loke ta e entrada. Pa por drecha e caminda, nan ta canando un caminda basta largo.
Ruben Toto Luna, encarga di El Mexicano Restaurant a splica cu nan ta den un situacion basta fastioso. Esaki ta door cu a cera e entrada principal dilanti Bushiri Karting ora cu a construi Watty Vos Boulevard. Tin un otro entrada, pero esaki ta completamente un omweg. E caminda aki ta di santo y den mal estado.
E ta splica cu ora di awasero, e caminda ta bira mas fastioso. Nan ta yama DOW, pero a manda nan di un departamento pa otro. Segun Luna, tin biaha DOW a presenta pa drecha e caminda, unda cu ta rasp’e pero ora awa cay ta mesun storia. Loke tanto Luna como propietario di Rocco Beach Tours y Bushiri Karting ta pidi ta un solucion na e situacion fastioso aki.
Ruell Justina, propietario di Rocco Beach Tours y Bushiri Karting, a bisa cu nan ta den un situacion fastioso, specialmente na e momentonan aki cu yen di awasero. A traha e high way y e ta algo excelente, pero no tin un bahada pa yega cerca nan. El a splica cu nan a haci Bushiri Karting accesibel pa tur hende yega y core go kart, cual antes hendenan profesional so tabata core eynan pero desde 2011 tur hende por huur go kart.
E caminda ta malo, pero ora awa no yobe tin buraconan chikito y ora awa yobe tin plasnan grandi. Esey a stroba nan benta hopi, segun Justina. Aparte cu auto ta susha, taxistanan ta nenga di yega eynan. Un otro problema cu esaki ta cu e ta kibra hopi piesa di auto. Un trahado mester a cambia piesanan di auto y acerca nan cu e recibo puntrando unda por manda nan pa cobra. Justina mes tin hopi aña ta pidi gobierno pa asfalt e caminda, a manda carta pero tambe a papia cu hendenan di Katra.
Ambos negociante kier sa con gobierno por yuda nan cu e problema aki cu ta uno grandi. Nan tin hopi gasto y specialmente den e temporada aki, unda cu kier spaar y ta duna empleo, pero ta gastonan tin di piesanan cu a kibra. Tin hende cu kier yega cerca nan pero no ta haci esey. Luna a busca manera pa papia cu DOW, a manda carta pero no ta mira un luz na horizonte.
