Un biaha mas a yega e momento pa yena formulario di impuesto. Hopi hende ta busca un persona cu por yuda nan cu esey. P’e motibo aki Centro di Bario Playa Pabao ta habri su portanan pa yuda yena e formularionan di impuesto.
Dennis Burke, presidente di Centro di Bario Playa Pabao, a splica despues di nan exitoso charla di trafico di siman pasa, nan ta continua cu e siguiente actividad. E yenamento di formulario di impuesto ta tuma luga riba e dianan 12, 13 y 14 di september. Nan lo ta haciendo esaki desde 6:00 pm te cu 8:00 pm.
Aña pasa nan a organisa e actividad aki y a yena cincuenta formulario. P’esey nan a pensa di continua cu esaki e aña aki un biaha mas. Na momento cu presenta, mester tin e formulario di impuesto, cedula of rijbewijs, resumen di salario di 2022, si e persona ta casa mester tin di su pareha tambe. Mester tin nomber completo y fecha di nacemento di e yiunan si a bay scol na aña 2022.
Declaracion di gasto di hipoteca, seguro di bida cu ta cubri hipoteca, declaracion di interes personal y credit card. E gastonan medico cu AZV no a cubri den aña 2022, sin lubida declaracion di scol cu e yiu a bay Hulanda na aña 2022.
Burke ta invita no solamente esunnan di bario di Playa Pabao, pero Aruba general, cu si un hende tin problema di aangifte, pa pasa cerca nan. E yenamento di formulario 2022 ta uno gratis.
