Dennis Arends t’un yiu di Savaneta, el a lanta y biba henter su bida na Savaneta. E cas caminda e ta biba tabata cas di su padushi sigui pa su tata y awo ta su cas.
For di algun aña su bida a bira menos placentero cu yegada di Aruba Ocean Villas. Antes for di su cas e por a mira lama, pero esaki ya no ta posibel mas. E tempo ey, e tambe tabata un di esunnan cu a protesta pa cu yegada di Aruba Ocean Villas.
E situacion a escala na momento cu e propietario, Osyth Henriquez a pone un delco grandi pa cual ta sac’un zonido cu ta terorisa henter e area. Tin hopi hende grandi ta biba den vecindario y e delco ta cendi henter ora. Paz mental ta locual e ciudadanonan no tin mas.
Arends a conta Osyth a haya henter e saliña y tereno regalo for di gobierno. E generator ta saca un zonido y stroba tur hende. E tempo ey Osyth a vocifera cu Rubiano ta come Rubiano. Segun Arends, aki no tin cuestion di Rubiano ta come otro, simplemente cu Henriquez kier intimida e habitantenan mirando cu e, den pasado a protesta contra su proyecto.
Arends tin cuater dia ta bay polis pero no tin ningun solucion. Anochi casi e no por drumi, e zonido ta insoportabel. E ta sinti cu e tin derecho di biba trankilo. “E ta un abuso formal”, Arends a vocifera.
E ta haci un suplica na prome minister Evelyn Wever-Croes pa “bin drecha e cos”. Ta Wever-Croes a fix Henriquez e tereno, segun Arends a vocifera. Semper ta mira fiesta grandi cu integrantenan di MEP ta asisti, a yega momento pa nan investig’e tambe. “E ta un abusado”, Dennis Arends a finalisa bisando.
