Dialuna pa diamars marduga Wardacosta a canta bingo pa otro grupo di personanan deteni, ora cu nan a trata di drenta Aruba di un forma ilegal.
Tabata dialuna anochi cu a tuma nota cu e helicopter tabata bula rond di cierto punto riba lama y cual ta un indicacion caba cu tin algo na caminda. Un rato despues autoridadnan a canta bingo ora cu a confirma via di radar cu tin un boto acercando e costanan di Aruba, carga cu hende.
A dura basta largo prome cu a yega cerca pero tur unidad tabata prepara. Riba lama tabatin dos boto di Wardacosta, helicopter y e dashi di Kustwacht bulando y na tera diferente unidad policial y e funcionarionan di CEA, sperando cu transporte pa hiba e hendenan e facilidad di Warda Nos Costa.
A dura mas cu cinco ora prome cu e boto a yega tera escolta pa funcionarionan di Wardacosta. Ta parce cu e intencion tabata pa baha e grupo di ilegal aki na costa nort di Aruba, mescos cu un otro caso cu a tuma luga den luna di september. E biaha ey autoridadnan a haya solamente un boto y no a haya sa cuanto hende a yega e isla te pa drenta.
E informe oficial di Wardacosta ta bisa cu dialuna anochi e Centro Operacional Maritimo di Wardacosta a tuma nota di un lancha procedente for di zuid bayendo direccion di Aruba. Inmediatamente a manda e Dash 8 pa confirma esaki y a constata cu tawata tin un cantidad grandi di persona riba e boto.
Na momento cu e Metal Shark a yega, a confirma cu tawata tin un total di 38 adulto Venezolano indocumenta riba e boto, di cual 3 hende muhe y 35 hende homber.
E helicopter di KPA (Korps Politie Aruba) a asisti durante e accion p’asina ilumina e area caminda e boto tawata. E condicion di e lancha tawata hopi malo y pa e motibo aki a pidi un Metal Shark adicional pa asina transporta tur hende di un manera responsabel.
A entrega tur persona na Guarda Nos Costa.
Esaki si nos no ta ekiboca tabata e di diestres boto cu a intercepta cu personanan indocumenta pa loke ta bay den 2023.
E detencion di dialuna pa manece diamars tabata tambe esun di mas grandi di un solo tiro, esta 38 persona cu a purba drenta Aruba den un lancha, y den mal condicion. E otro mas grandi tabata di dia 28 di september ultimo, ora cu un boto cu 28 homber abordo a trata di drenta Aruba.
Segun por a compronde for di algun di nan compatriota aki na Aruba, e situacion na Venezuela a empeora y cual ta haci cu e hendenan ta tuma riesgonan grandi, subiendo abordo di un lancha, por ehempel, cu ta den masha mal condicion. Basta cu nan trata di yega Aruba.
Haciendo un investigacion di anuncionan haci door di Kustwacht e aña’ki, por bisa cu esaki tabata e di diestres bes cu a gara personanan indocumenta. E prome porciente tabata riba e prome dia di aña ora cu 21 persona a yega na dos diferente punto di Aruba.
Tabatin dos bes cu a topa cu boto pega na tera, indicando cu hende a yega, pero no tabatin detencion haci.
April tabata e luna cu mas biaha a gara botonan ilegal, 4. Pero por bisa cu practicamente tur luna tin un boto gara. Sinembargo ta berdad tambe cu tin grupo ta logra yega, si cu a detecta nan.
Pa e diestres besnan cu a gara e botonan ilegal, esaki tabata cu en total 169 persona di cual gran mayoria ta Venezolano. Den varios caso a confisca droga tambe.
Esaki ta cifranan acumula pa Aruba, sin conta esnan di Corsou of e otro islanan.
