Cosecha ta keda ofrece actividadnan creativo den e delaster lunanan di aña. Pa por yuda balansa e dianan hectico y stimula creatividad en general, Cosecha ta ofrece workshops creativo como tambe opcionnan pa loke ta trata D.I.Y. (“Do-it-yourself”). Cosecha ta ofrece opcionan na su Centro Creativo na San Nicolas, online of na localidad pafo di Cosecha. Ta importante pa sa cu durante e actividadnan creativo na San Nicolas, ta tuma tur precuacion di higiena y siguridad en conexion cu COVID-19.
Diasabra 28 di november, Gloria Filiciana ta finalisa su prome linea di workshops di joyas na Cosecha. El a cuminsa den september cu e cadena y a sigui den october cu e armband. E participantenan lo siña e tecnica di wire-wrapping y ta incorpora un seaglass den dje. Den luna di november lo traha renchi di orea cu e mesun tecnica. E workshop lo tuma luga di 10.00AM – 11.30AM. Edad pa por participa ta 14 aña bay ariba y e prijs pa por participa ta AWG 50.00 y ta inclui material y un bebida refrescante.
Cosecha San Nicolas ta habri riba diabierna y diasabra den luna di november. Riba e dianan aki, ta ofrece e oportunidad pa pinta bo “tote bag”. Door cu e ta un D.I.Y. (“Do-it-yourself”) bo mes por traha y pinta bo diseño, pero personal di Cosecha tambe ta presente pa asisti den crea un diseño si ta necesario. No mester reserva, por walk-in y haci bo D.I.Y. Oportunidad pa haci un D.I.Y. ta entre 12.30PM y 6.30PM ora e tienda ta habri. D.I.Y. ta un actividad creativo por ehempel pa muchanan, pa grupo di famia of amigonan. Tambe por pasa Cosecha Oranjestad y San Nicolas pa por cumpra e D.I.Y aki pa traha riba dje na bo cas mes. E ta inclui e tas, verf y ehempel pa diseña e tas. E prijs pa un D.I.Y. ta AWG 15.00 y ta inclui material.
D.I.Y. pakete di Mosaic pa haci na cas. E luna aki Merveline Geerman ta ofrece e D.I.Y. pakete di pauwies via Cosecha. Por bestel e paketenan aki na Cosecha pa por traha e piesa di Mosaic na cas. Na e manera aki Cosecha kier ofrece un alternativa na esunnan cu ta prefera di ta creativo na cas. Nan a cuminsa cu e linea di Mosaic di Merveline den september, unda cu despues di e gay y e galiña na october ta sigui cu e pauwies. Por bestel e pakete di pauwies no mas tarda cu diasabra 5 di december y por busca esaki diasabra 12 di december. E prijs pa un D.I.Y. pakete ta AWG 50.00 y ta inclui material.
Pa mas informacion por tuma contacto cu Cosecha Oranjestad na telefoon 5878709. Tambe por manda un email na [email protected]. Pa por keda informa di Cosecha su workshopnan, artesanonan, artistanan y nan webshop nobo por bishita nan Facebook page: Aruba-Cosecha Instagram page: cosecha_aruba y Webpage: www.arubacosecha.com.
