Recientemente Respaldo a celebra un evento di despedida hopi ameno y emocionante pa Dr. Hendrikus van Gaalen, kende a fungi seis aña como director medico di e organisacion y casi 30 aña di su bida como psikiatra na Aruba.
Na e ceremonia aki a asisti hopi miembro prominente di comunidad y stakeholders pa celebra e despedida di un persona cu a trece hopi cambio positivo riba e tereno di salud mental na Aruba y cu semper tabata un bos importante riba e tereno aki.
Despues di seis aña di servicio y dedicacion inmenso como director medico di Respaldo, Dr. Hendrikus van Gaalen a dicidi pa retira entrante di 31 di october 2023.
Durante e encuentro aki empleadonan, ex- coleganan, Minister y stakeholdernan a expresa nan gratitud pa e dedicacion di Dr. Van Gaalen durante e añanan na e psikiatria di Aruba. E evento tabata un ceremonia emocionante di aprecio pa su contribucion na bienestar mental di e comunidad Arubano. Hopi hende ta aprecia su contribucion y a reconoce esaki durante e ceremonia di despedida special cu a tuma luga diabierna siman pasa na Parke Arikok.
Cu e partida di Dr. Van Gaalen ta marca e fin di un era na Respaldo, den cual su liderazgo y dedicacion a sa di tin un impacto positivo y avansenan grandi riba salud mental na Aruba.
E hunta di Supervision di Respaldo a anuncia cu un miembro di e hunta, den persona di mr. Caroline Hart, lo fungi temporalmente como director interino conforme e statutonan di Respaldo pa un periodo di 4 luna. Mientrastanto e Hunta di Supervision ta siguiendo e proceso pa recluta un director nobo permanente pa Respaldo cu lo tuma e liderazgo pa sigui traha riba nan mision di brinda un salud mental di calidad na Aruba.
E Hunta di supervision di Respaldo kier a gradici Dr. van Gaalen un biaha mas di curason pa su dedicacion incansabel den su trabou cu el a desplega durante e 6 añanan cu a pasa y ta desea Dr. van Gaalen tur cos bon pa futuro.
