Presidente di Sindicato di Trahadonan di Aruba (STA) cu ta representa un grupo di trahado na aeropuerto, ta lamenta mal informacion cu sindicato FTA ta lama. Esaki relaciona cu e caso den Corte cu FTA a perde y ta haci comosifuera cu a logra cos adicional pa nan 9 miembronan. Sigur nan no a haya mas cu esnan cu a tuma e prome pakete di retiro boluntario, Diego de Cuba, e presidente di STA a bisa den un declaracion.
Siman pasa Corte a tuma un decision den e caso cu FTA a bay Corte pasobra no tabata di acuerdo cu e pakete di retiro ofreci door di Triple A.
De Cuba a cuminsa pa conta e historia di pakete di retiro di cual e prome a bini cu ne ora cu ni STA ni FTA tabata envolvi of no tabatin nada di bisa. Un grupo grandi a tuma pakete y a bay. Despues a bini cu un reorganisacion y a presente e di dos pakete. STA a sinta cu team di gerencia y a negocia pakete pa e grupo cu mester a bay. Reorganisacion ta un procedura cu semper ta keda den man di e compania y den esaki sindicatonan no tin nada di bisa. E ta un caminda cu mester trata di evita di yega ey, pasobra e por trece resultado no desea. “STA awor a haya rason cu esaki t’asina.”
El a cuestiona e forma con sindicato ta gaña dunando informacion incorecto cu e resultado di diabierna ultimo den Corte. E trahadonan miembro di FTA mas bien a perde casi 100 mil florin.
Pa mas informacion, subi riba www.trempan.com.
