Desde ayera por a tende cu e stacionnan di gasolin ta pensa si nan ta bay stop di tuma debit-card. Tur esaki tin di haber cu banco kier cobra e stacionnan di gasolin e suma di 75 cen pa transaccion. E comerciantenan no ta di acuerdo cu esaki y a reuni awe pa yega na un solo posicion. Esey ta si ta sigui uza e mashin di swipe of no.
Un factor grandi pa nan ta cu banco ta gana mas, pasobra sea a paga cu debit-card pa un suma di 10 florin of 100 florin e costo pa transaccion ta keda 75 cen, mientras e stacionnan tin mas gasto. Pasobra incluso ora cu e stacionnan di gasolin deposita placa, e banco ta cobra nan pa conta e placa aki.
Despues di e reunion e doñonan dje stacionnan di gasolin no a duna un reaccion riba nan decision. Un di e doñonan a indica cu despues nan lo duna informacion di nan decision riba henter e asunto aki.
