E situacion na ATA ta bini ora cu compania tin suficiente forsa financiero pero ora di sinta na mesa pa negociacion di un CAO gerencia ta manipula.
Esaki ta loke sindicalista Diego de Cuba a bisa durante e accion di un ora di trahadonan di Aruba Tourism Authority (ATA) diabierna atardi.
El a splica cu pa casi un aña nan ta sinta na mesa y ta tratando continuamente pa hinca awa den biña, pero e biña a bira awa caba y no por duna mas di nan banda.
A entrega un ultimo proposicion cu despues ATA a contesta cu un proposicion descabeya. “Loke nos ta pidi ta peanuts pa loke e hendenan grandi ta gana. Si ATA no tin placa ta otro cos, pero tin placa.”
Mirando e situacion, e sindicalista a bisa cu Minister mester saca su conclusion y cambia gerencia. Na mesun momento De Cuba a bisa cu nan ta spera cu e accion aki lo no trece represalia pa e trahadonan. E hendenan aki a wanta hopi y si awo nan a sali pafo ta pasobra e hemchi a pasa over. E accion a bini despues di e ultimo proposicion ricibi diahuebs atardi.
Pa STA e accion aki por a bini hopi tempo pasa pero e trahadonan a dicidi di duna hopi di nan banda y trata di duna mas chens na ATA.
El a mustra cu e CAO logra na ANSA unda cu e trahadonan a haya bon beneficio y esey tabata pasobra e compania por a “afford” esaki. ATA ta genera hopi placa, p’esey e ta puntra unda tur e placa ta bay. Y riba dje ATA no kier entrega lista di salario na minister encarga. E hefe di ATA di su banda tin un salario descomunal cu tres biaha a haya aumento. E cosnan aki no por sigui asina mas, Minister y Gerencia mester saca nan conclusion.
A dicidi cu e accion di awe lo tin un duracion di un ora y despues ta reanuda nan trabou. A manda carta pa ATA caba, unda a bisa cu nan ultimo proposicion ta esun cu STA kier pa wordo honra sino lo bini cu mas accion.
E disgusto di e trahadonan ta di con tin mehoracion pa e grandinan, pero no pa e trahadonan, cu ta esnan cu ta pusha turismo pa Aruba. Nan ta esnan cu berdaderamente ta traha y pusha, nan no ta esnan cu ta bini dilanti camara pero esnan cu ta traha, De Cuba a expresa. Y a agrega cu minister ta na altura di tur e negociacion cu a bin ta tumando luga, inclusive e accion planea dor di e trahadonan. Tin espacio pa duna e empleadonan di ATA loke nan ta pidi, pero door di e gerencia terco, cu no ta habri pa negosha, no ta avansando. “Tin espacio di sobra, p’esey nos ta aki pa demostra hunto cu trahadonan nan malcontento.” Loke nan ta pidi ta 150 florin pa luna di cual 30% ta bay bek pa caha di Gobierno. “Duna mi hendenan locual nan merece y paz laboral lo reina,” e sindicalista a finalisa bisando.
