Relaciona cu e reunion publico pa ancra e ley di ombudsman, ex-parlamentario, Daphne Lejuez a comenta riba e nivel di e reunion. Durante un entrevista via yamada telefonico, Lejuez a conta cu; ta hopi lamentabel cu cabesura y arogancia politico a causa cu ainda no por ehecuta e ley di Ombudsman. Un reunion unda un presidente di parlamento cu mester ta imparcial ta duna su opinion prome cu e reunion y hasta durante e reunion contra tur regla di reglamento di ordo di parlamento – e deficit democratico ta bisto y ta tristo pa wak e estado di nos democracia y ta mina trias politica di e forma aki. Mas a leu Lejuez a conta cu, un bes mas ta debi na falta di comprension di parti di presidente di parlamento cu su tarea tabata pa purba busca consensus en bes di division unda e tabata bagatalisa y ridiculisa e preocupacion di oposicion publicamente, cual ta algo cu ta completamente linea recta cu e funcion cu e tin unda e ta representa tur parlamentario y no su mes.
Relaciona cu e amienda caminda ta haci e retiro di un minister mucho mas facil y sin pasa via parlamento, Lejuez ta sinti cu esaki lo a mina e tarea di control di parlamento y trias politica mirando cu parlamento mester por sigura cu e persona apunta como minister ta carga aprobacion di e mayoria cu ta representa pueblo den parlamento, mescos lo conta pa retira un minister unda mester delibera cu parlamento tambe.
Lejuez ta lamenta e forma dictatorial, intransigente y arogante con presidente di parlamento, mr. Edgard Vrolijk a dirigi e reunion unda gran parti di e parlamentarionan di coalicion no tabata ni compronde locual a trata, pasobra tabata keda referi na ley di Ombudsman, pero a trata cambio di ley di nos constitucion pa por ancra e ley di Ombudsman cu a pasa caba unanimamente na 2020. E nivel a laga hopi di desea, pero esaki tin hopi di haber cu e forma con e reunion ta dirigi un reunion. Mas a leu Daphne Lejuez a conta cu; un dia nos por cambia con ta eligi un presidente di parlamento, p’asina por ta realmente independiente y na unda e por ta retir’e si e no ta haci su trabou segun e reglemento di ordo di Parlamento.
Na final Lejuez a comenta riba e amienda cu el a presenta tempo cu e tabata den parlamento, e ta sinti cu ta tristo cu no a logra yega na otro pa por fin implementa e ley di Ombudsman cu ta sumamente importante y tambe logra reduci e vulnerabilidad politico di e Ombudsman door di inclui cu e no por wordo geschorst of kita cu 2/3, pero di e otro banda mi ta aprecia cu a duna e amienda aki e importancia mererci y no a djis aproba un ley bou cual e instituto Ombudsman lo por wordo influencia politicamente.
