Si gobierno sigui den e direccion cu e ta bay e lo laga Aruba sin flora y sin fauna. Imagina bo hasta na Hulanda nan a corta e tulp. Hopi integridad mes. Esaki ta pasa ora un gobierno bay contra e leynan di Dios. Nos politiconan nunca tabata tin Aruba na prome luga. Aruba a gosa y te ainda ta gosa di un boom economico. Un boom cu a genera mas cu 24 biyon di florin den caha di gobierno. Biyones di florin cu no a wordo bon administra pa nos gobernantenan. Durante campaña ta priminti cielo riba terra pero ora di ta den gobierno ta haci lo contrario. Awe cu Aruba tin mas cu 6 biyon na debe ta danki na nos gobernantenan.
Si e placa di pueblo a wordo bon administra lo pais Aruba no mester a fia placa pa traha un Green Corridor, Watty Vos Boulevard, Warda di polisnan Shaba y Santa Cruz, MFA den e barionan, Hospital cu te ainda no por keda cla y asina nos por sigui menciona. Lo no mester tabata tin un aumento riba prijs di awa y electricidad. Laga nos no papia mes di e situacion di e planta di purificacion na Bubaliplas. Nos grandinan lo no mester paga pa remedinan, lo no mester a aumenta schoolgeld. No mester a pone tanto medida asina riba lomba di pueblo. Edad di pensioen lo no mester a bay na 65 aña.
Nos por corda cu minister Glenbert Croes durante campaña na 2017 a campaña cu partido MEP den gobierno edad di pensioen lo baha na 62 aña. Un otro grito den desierto paso te dia di awe no a haci nada cu edad di pensioen al contrario awor kier his’e. For di e mas cu 6 biyon florin di debe solamente 560 miyon florin a wordo inverti.
Locual cu nos pueblo no mester lubida cu partido MEP a core un campaña cu nan conoce e materia y lo goberna sin medida. Historia ta demostra cu partido MEP den gobierno a suta pueblo cu medida. Nos por corda cu nos minister president a entrega nos Status Aparte riba e diabierna scur di 13 di november 2020. E entrega di nos Status Aparte a mira introduccion di e Landspakket.
Por cambia nomber pa Onderlinge Regeling pa tur otro nomber pero e Landspakket keto bay ta wordo implementa. Pueblo mester habri su wowo hancho pa e punto den Landspakket cu ta e open border policy. No por permiti pa Aruba bira manera Hulanda y otro paisnan na Europa. Nos di partido CURPA ta kere cu e frontera cu Venezuela por lo pronto mester keda cera y no pensa mes riba e ferry. Stranheronan ta haya tur cos pero ta lubida riba yiunan di tera.
E trato aki a pone cu Europeonan no kier tende di partidonan socialista/comunista. Un pais manera Alemania tambe ta papia di bandona Union Europeo y esaki ta pasa ora cu criminalidad a subi drasticamente na e paisnan cu ta forma Union Europeo. Ta uza e placa di pagado di belasting pa maltrata yiunan di tera.
E Metanan di Desaroyo Sostenibel ta mustra claramente den ki direccion nos gobiernonan den ultimo 20 aña a hiba nos isla. Tur caminda cu a implementa e puntonan aki e pais no a bay ningun stap padilanti sino atras. E modelo socialista ta un modelo dictatorial caminda e pueblo mester bira pober y biba na rudia.
Un hecho ta cu economia mundial lo bin abao paso tur pais ta den debe. Rond mundo e banconan ta dal nan porta cera y no solamente ta manda trahado cas y esunnan cu tin un cuenta bancario ta perde nan placa. Ora no papia cu e mundo ta den crisis esaki lo bay afecta nos isla tardi of tempran. No solamente prijs di cuminda lo sigui subi pero lo bay tin un scarsedad grandi di cuminda. Aruba lo bay sinti efectonan aki y gobierno no a traha dam warda awa.
Nos unico speransa ta den nos Dios paso lo no tin otro caminda. E parlamentarionan supuestamente cristian te dia di awe no a hasi nada na bienestar di nos pueblo. Al contrario nan ta sigui sostene nan gobierno cu ta trapa no solamente e pueblo cristian sino riba henter pueblo. Partido CURPA ta e unico alternativa.
