Diasabra 19 di september, 4 modelo special di ‘Sea Bunita Sea Bo Mes’ a sali riba e pantaya gigantesco (billboard) na Time Square New York.
A estrena esaki mientras cu miles di persona por a wak Shawndré Geerman, Regina Janga, Jaydrick Clement y Sara Mora Contreras durante e evenemento cu National Down Syndrome Society ( NDSS) a organisa riba Time Square na New York pa 2021.
Anualmente NDSS ta recorda riba e cariño special cu e personanan cu Down Syndrome ta influencia den nos comunidad. Durante un presentacion riba e pantaya gigante (bilboard) riba Time Square na New York, a presenta 500 persona cu ta consisti di mucha te cu adulto cu ta Down Syndrome. E video mas bien ta un forma di recorda y contribui e logronan y balor cu e personanan cu Down Syndrome tin den nos comunidad.
E meta di NDSS ta pa crea concientisacion, aceptacion y inclusion pa e personanan cu tin Down Syndrome. Diasabra hopi famia a bin for di tur skina di mundo y a topa na New York pa participa den diferente evento organisa pa NDSS. Debi na e pandemia, atrobe e encuentro tabata diferente. Despues di mustra e video riba Time Square tur participante a asisti na diferente evento virtual cu e organisacion a presenta. Tabatin entre otro un ceremonia di apertura virtual di NYC buddy Walk, un fiesta pa entrega di premio.
Tur esaki transmiti virtualmente na mas cu 150 cuidad na Merca y tambe den diferente part’i mundo caminda mas di 325 mil persona a conecta via di internet. A pesar di e crisis di pandemia NDSS toch a logra organisa e evento special aki unda Shawndré, Regina, Jaydrick, Sara y tur otro persona cu Down Syndrome por a participa. Esaki sigur ta un tremendo logro pa nos dushi isla Aruba.
