E aña aki ta cuarenta aña pasa cu a organisa Festival di Tumba Hubenil pa prome biaha y ta cuarentiun aña pasa cu a organisa Festival di Tumba Infantil pa prome biaha. Y e prome rey di tumberito, tanto infantil na 1983 como na 1984 den hubenil a resulta Oslin Trimon.
Nos por corda cu den e decada di 1980 mayoria, pa no bisa tur actividad, tabata tuma luga den Club RCA na Solito.
Con e idea a nace pa Oslin bay competi den Festival di Tumba Infantil? Oslin a conta cu e tempo ey e tabata forma parti di coro Tutti Frutti di Maybeline Arends-Croes. Y tabata eynan e e Oslin a bay participa den Tumberito Infantil. E aña ey, 1983, ainda no tabatin Festival di Tumba Hubenil.
![](https://24ora.com/wp-content/uploads/2024/01/Oslin-3.jpg)
TUMBA INFANTIL
Tabata na 1983 cu tabatin un Festival di Tumba Infantil, di cual Oslin Trimon a resulta ganado cu su cancion “Pisa, Pisa”. Asina tambe Oslin a bira e prome Rey di Tumba Infantil di Aruba. E compositor tawata Eri Donata, areglista Franklin Granadillo y tabata compaña Orquesta “Sumedad H” di maestro Hector Hasham.
E aña ey ainda no tabatin Festival di Tumba Hubenil ainda.
TUMBA HUBENIL
Tawata na 1984 cu a organisa e prome Festival di Tumba Hubenil y aki tambe Oslin Trimon a resulta e prome Rey di Tumba Hubenil.
E aña ey, Caroline Kelly d.f.m a participa den Tumba Infantil cu e cancion “Ban sende bela” y a bay cu e corona tambe.
E titulo di su tumba e aña ey tabata “Hala bin pega”. Composicion tabata den man di Jeffrey Franken y e areglista Franklin Granadillo. E orkesta cu a compaña e cantantenan e aña ey tawata La Nueva Fuerza di Vicente Kelly d.f.m.
Tabata na aña 1984 cu a organisa e prome Festival di Tumba Hubenil di cual Oslin un biaha mas a bay cu e titulo maximo.
![](https://24ora.com/wp-content/uploads/2024/01/Oslin-1-1080x1440.jpeg)
![](https://24ora.com/wp-content/uploads/2024/01/Oslin-2-1080x1440.jpeg)
KEN TA OSLIN TRIMON
Oslin Alex Trimon ta bin di e bario di Tanki Leendert y ta yiu di Sixta y Marco Trimon. E ta bin di un famia musical cu semper tabata activo riba tereno musical den diferente genero.
Semper el a keda activo den e mundo di musica y a forma su mes tambe como trompetista profesional. Pa un temporada largo e tabata hopi activo riba tereno social-cultural y tabata traha hopi di cerca cu mucha. Pa cu esaki algun aña atras, el a wordo condecora pa S.M. Rey Willem-Alexander como Ridder in de Orde van Oranje Nassau.
Tambe Oslin ta tata di tres yiu y welo di dos nieto y un nieta.
Leyenda 1: Oslin dunando su presentacion di su cancion ‘Hala bin pega
Leyenda2: Na momento cu ta corona Oslin como Rey di Tumberito.Oslin durante su presentacion den club RCA.
Leyenda 3: Oslin cantando su cancion ‘Pisa Pisa’ den Parada di Mucha na 1983.