Comerciante Uni Aruba (CUA) a tene un rueda di prensa pa informa comunidad riba e confusion cu tin riba recibo, debi na duana. E preocupacion riba duane waarde ta algo cu nan a trece den pasado caba. CUA kier haya un aclaracion di Duana riba henter e situacion aki.
Frans Ponson, presidente di CUA, a indica cu e preocupacion riba duane waarde a bin na momento cu nan a mira ora comercio of pueblo di Aruba cumpra algo riba Amazon, Duana semper tabata scrap e prijs cu bo ta paga. Aki Duana ta laga paga e tarifa completo (volle tarief) y nan no tabata laga acepta e descuento. E preocupacion aki CUA a trece dilanti na 2022, unda nan a haya reunion cu Duana di biaha.
A bin compronde cu Duana a manda un carta pa tur duana y tur esunnan cu ta traha cu factura. Den e carta di 2022 ta bisa cu “Duana no tabata acepta e rebaho door cu no sa di cua tipo di descuento tabata referi na dje.” Tambe ta poni cu ora ta trata di descuento cu ta bini di online shopping, Duana lo acepta descuento sin specificacion.
Awo den 2024, tin caso tras di caso unda cu por prueba cu Duana no ta aceptando esaki un biaha mas. CUA ta lamenta esaki. Ponson a duna un ehempel unda cu cliente ta cumpra dishwasher cu su prijs tabata na mil shen y a haya esaki na seis shen, e persona ta hay’e ta paga invoerrechten riba mil shen. Esaki ta dobel di e prijs. Esaki ta algo cu ta pasa cu frishider tambe. Ponson a indica cu nan tin tur prueba, hasta riba su VISA y kico e duana waarde ta.
P’esey CUA ta lamenta cu e cos aki ta pasa. Tambe a ripara cu cierto Duana ta lag’e pasa, otro no. P’esey CUA a duna nan e carta y a indica na nan cu mester acepta esey y algun duanero a bisa di no ta worry cu e papel. Esaki ta bini door cu den e carta ta poni di ta tuma un maximo di cinco porciento di descuento cash. Ponson ta haya cu esaki ta un bruhamento.
E cinco porciento di descuento cash no tin nada ke haber cu un compania cu ta dicidi di baha su prijs. E no por bisa cu si tin mal comprondemento, pasobra duana ta bisa e miembronan di CUA cu no por haya mas di cinco porciento di descuento.
CUA kier atende cu e situacion aki, pasobra nan no ta haya cu mester atende cu multi nacional so pero sino cualkier compania bon estableci. E ta haya cu a yega momento pa trece un clarificacion no solamente pa pueblo, pero pa comerciante tambe di kico tur ta acepta y kico no.
El a indica cu si comerciante y pueblo sigui acepta e cos aki, aunke e no ta referi cu sea Duana no ta malo ni tin e poder pa paga cambia prijs, nan mester tin e poder pa controla. El a insisti cu mester bin un clarificacion riba e asunto aki, pasobra dia di mañan gobierno por bisa cu si tin un grill di barbecue di 800 florin, y abo ta dicidi di bende na 400 florin, e ora ta bay cobra e cliente BBO riba e 800 florin. Esey ta e mesun cos aworaki. Ponson a indica cu si e dicidi di haci esey, e ta cobra BBO riba e 50% no riba e prijs ful. Si nan acepta con cos ta aworaki, dia di mañan gobierno por bisa cu e comerciante mester paga BBO riba henter e suma.
Pa mas lesa TREMPAN.COM.
