E gremionan ainda no a mira e ley di BBO na frontera y no ta di awo ta pidi pa mira esey. Tin cu sa con e ta pasobra BBO na frontera lo por pone cu inflacion lo bay for di control.
Frans Ponson, presidente di Comerciantenan Uni Aruba, a indica cu e ta depende di e mercado, pasobra si bo no sa e ley, tin compania por trek e af. Tin caminda no mester tin inflacion. Pero si e comerciantenan no compronde, eynan tambe tin inflacion. Tin caminda e ta trece inflacion.
Ponson a sigui bisa cu tin hende ta bisa cu e no ta trece, pero tin caminda no por trek af. Tur loke por compronde te cu awe, segun e gremio, tur e restaurantnan ta bay tin inflacion pa motibo cu nan no por trek af nada. Asina aki ta haya tur e franchise na Aruba cu ta cumpra producto directamente afo, no por trek af. Na tur esey tin inflacion, na cierto caminda si, na cierto caminda no. Pero, si ningun hende no ta haya informacion corecto, un comerciante ta cuminsa haya miedo, ya nan ta preocupa caba e cos aki ta innecesario si hacie profesionalmente. Den nan caso e no mester cambia nan prijs.
Esey ta pasa ora cu e comerciantenan ta compronde e cos bon. El a indica cu no ta tur comerciante, pasobra tin cu si mester subie y tin esun cu no mester. Esey ta cos cu nan tin di aclaria cu Departamento di Impuesto (DIMP) pa wak bon. Segun Ponson, den su caso nan no ta supone di cambia prijs.
Pero e lo trece mas administratie, pa motibo cu mester bay houd bij y sigura cu DIMP ta haya e suma di BTW, di BBO cu e ta paga. Mester controla y e tambe tin mas trabou e ora. E lo mester pone un hende, pasobra ta trata di hopi placa. Tin comerciante chikito tambe lo kier bay controla e cosnan ey y cu tambe ta gasto. E no por bisa cu nan ta bay hinca e gasto.
Ponson a indica cu ta bay tin extra gasto, si ta administracion. Tin hopi negoshi cu si mester bay hisa prijs, manera nan tin e awe. Raad van Advies a duna conseho, pero Comerciantenan Uni no a mira loke Raad van Advies a bin cu ne. Nan no sa si a bin un cambio of no. Pero nan ta gremio cu mester bay sinta cu tur comerciante cu ta cu nan. Si no por duna un contesta, loke un comerciante mester haci ta ‘zeker voor het onzeker.’ Tin cu paga shete ora di importa, kiermen e comerciante ta subie cu shete. Si haci esey e ta algo iresponsabel.
Comerciantenan Uni ta spera cu nan por haya e ley prome cu nan sac’e. E ta kere cu tur gremio na Aruba por duna input prome cu nan hacie. Ora cu nan tin e cla, pa nan inform’e na tur comerciante di Aruba p’asina no haci un inflacion y despues purba soluciona e problema. Mester purba di bin cu e solucion prome cu haci cambio pa loco.
Francis Saladin, vice-presidente di Comerciantenan Uni Aruba, a indica cu mester stop di haci cos descabeya, pero pa haci e cos ki na drechi.
