Iberostar Group N.V. ta un compania turistico cu un compromiso pa un turismo responsabel, cu enfoke den cuido di su hendenan y di medio ambiente. E compania tin mas di shen propiedad di cuater y cinco strea ubica den diferente destinacion popular den Europa, Africa, Merca y den Caribe. Desde algun aña nan a adkiri dos propiedad na Eagle Beach y algun tempo atras a cumpra Tierra del Sol.
E plan ta pa cuminsa cu un hotel, unda antes tabata POVA Club na Eagle Beach. Ta trata aki di un compleho di 240 camber di hotel, un casino, convention center, varios piscina y mucho mas. Ta un inversion multimiyonario cu e doñonan a inverti den nos pais, di cual e hotel na banda di Eagle Beach lo ta di nan top categoria, conoci como Iberostar Grand, dedica solamente na huesped adulto, mientras cu esun patras, unda antes tabatin e waterpark, lo ta di un otro categoria mas dedica na famia y como tal lo acepta mucha. Nan tambe lo tin un waterpark y speeltuin enorme. Ta bon pa splica cu, aunke tur Iberostar den Caribe ta “all inclusive”, cu e hotelnan na Aruba lo ta di estilo European Plan (EP).
Lo habri pa zomer otro aña
Mientras cu tin trabou pisa di construccion andando, gerencia di Iberostar Aruba ta premira pa habri nan hotel den zomer otro aña. Cu esey ya nan ta core dos luna atras, debi na contratiempo inespera y for di nan alcanse. Te ainda no a scoge un gerente general pa maneha e propiedad, pero si a inicia e prome movecion pa reclutacion di empleado. Nan ta bon consciente cu e procedura di logra recluta empleado no ta facil, pero nan a admiti cu no ta Aruba so, sino rond mundo trahado den turismo ta scars.
Servicio a surpasa tur expectativa
Durante un bishita di dos dia di un grupo di prensa local na Iberostar Grand na Cancun, Mexico, a resulta den un impresion cu a surpasa tur expectativa. Biniendo di un isla unda servicio ta esencial, nos a topa cu un servicio di kita sombre. For di momento cu bo baha for di taxi, na front desk, te na e bellboy cu ta hiba bo camber, te na room service, servicio na piscina, restaurantnan y discotec, tur ta riba e normanan cu lo spera. Tur caminda ta topa empleadonan cu un sonrisa riba nan cara y super servicial. Dificilmente nan ta contesta “no”, pasobra si no por mes, nan ta percura pa hacie posibel. Mayoria empleado ta di Mexico mes y Iberostar Aruba ta purba pa di tur manera recluta mas tanto Rubiano posibel pa por garantisa e nivel halto di servicio na nan huespednan. E cadena di hotel tin un red grandi di huesped cu ta biaha rond mundo y ta prefera di keda den nan hotelnan so!
Diseño ta cla
E diseño inicial di e prome hotel di Iberostar ta cla y tabata den man di un diseñado Spaño cu ta responsabel pa diseña tur nan hotelnan den Latino America y Caribe. E ta percura pa e diseño pfo y interior di e facilidadnan, teniendo cuenta cu aspectonan local, manera na Aruba ta tene cuenta cu nos lama, pisca y nos driekiel. Bisando esey a scoge colornan Caribense pa decora interior di e hotel, incluyendo e cambernan. Lo tin dos suite presidencial, cla pa cumpli cu e demanda di huespednan elite di e hotel.
ATA: Bonbini na Iberostar
Por lo menos dos ehecutivo di Aruba Tourism Authority (ATA) tabata invita pa e “Fam Trip” pa inspecciona e facilidadnan hotelero di Iberostar na Playa del Carmen, na Cancun. “Mi a keda impresiona di loke a mira aki. Si nan logra ehecuta loke tin awo planea, sin duda lo añadi na un producto adicional na e portfolio y producto Aruba. Sin kier bay den e discusion cu si Aruba mester di mas hotel, Ronella Croes a afirma cu esey no ta un asunto cu ta keda den man di ATA sino di gobierno, cu ta ssun cu ta otorg tereno y permiso.
Un cos si ATA a constata cu aki ta trata di un compleho di hotelnan Spaño, di un compania financieramente solido y bon organisa (a cumpra dos tereno pa hotel na Eagle Beach y a cumpra Tierra del Sol), cu un bon vision y cu hopi responsabilidad social y compromiso riba sostenibilidad, conservando naturalesa den tur nan facilidadnan. Nan nivel di amabilidad y servicio ta excepcional. E diseñonan cu a mustra e delegacion di Aruba ta demostra un adkisicion impresionante cu sin duda lo añadi un producto di calidad halto na e mix di ofrecimento di Aruba na su huespednan.
“E ta un socio nobo pa Aruba y manera semper ta importante pa traha di cerca cu sector priva y pa socionan nobo alinea estrechamente cu e vision di Aruba”, asina Ronella Croes a enfatisa.
Iberostar Grand ta e clase mas halto cu e grupo hotelero aki ta ofrece! Aki ta alinea cu vision Aruba. Por bisa tambe cu nan ta specialisa den e producto AI (all inclusive) pero na Aruba esaki lo no ta e caso! E echo cu lo ofrece hotelnan cu European Plan (EP) ta cuadra cu maneho di Gobierno di Aruba.
Sostenibilidad ta un punto fuerte, den locual Ronella Croes mes por a admira durante e bishita di inspeccion na varios hotel Iberostar situa na Cancun y vecindario. E compania aki por introduci practicanan cu otro den sector priva por aplica, asina catalisando introduccion di mas practica enfoca riba sostenibilidad. A demostra, durante e bishita, nan creatividad, nivel halto di producto, nivel halto di servicio, bon uzo di espacio y con e oferta ta tene cuenta cu detayenan. Nan ta hopi pro-activo y un socio cu di trempan ta den contacto cu A.T.A. trahando estrechamente cu nos caba.
Y sin laga luga na duda, e diseño conceptual pa Aruba ta brinda un producto diferente pa nos isla – moderno, trankil y incorporando cultura, flora y fauna di Aruba.
Renobacion total di Tierra del Sol
Pa cuminsa nan lo renoba henter e infrastructura di Tierra del Sol. No ta pornada nan a cumpra e cancha di golf. Den nan portfolio nan mes ta maneha varios cancha di golf, conoci pa tin competencianan internacional cu hungadonan di taya mundial. Como tal, nan tin hopi conocemento den maneho di cancha di golf, experencia den promocion y desaroyo y specialmente den nan mantencion. Loke nan ta bon conoci tambe p’e ta nan forma di uza practicanan sostenibel pa mantene e yerba y otro vegetacion riba y rond di e areanan di golf.
E renobacion di Tierra del Sol lo no ta solamente na e cancha pafo, sino dun’e cushina y tur otro aspecto rond di e restaurant, area di piscina, SPA y asina por sigui menciona. Nan ta haya hopi peticion pa organisa evento eynan, manera por ehempel casamento y otro eventonan corporativo. E intencion ta pa desaroya e restaurant y mantene habri henter dia. Ashico Martinus ta dirigiendo e restaurant y e cancha di golf actualmente.
Doñonan di propiedad den Tierra del Sol por keda trankil
Algun luna pasa tur esunnan cu tin un propiedad den Tierra del Sol a ricibi e informacion cu Tierra del Sol Real Estate N.V y Tierra del Sol Golf Course N.V. a pasa pa Iberostar Group N.V. E ultimo aki a adkiri e propiedad di tanto Tierra del Sol Real Estate N.V. como Tierra del Sol Golf Course N.V. Asumiendo e responsabilidad aki, Iberostar Group N.V. lo tin un compromiso grandi cu Aruba, un compromiso sosteni pa un historia sin precedente den e industria. Claro cu ta respeta tur acuerdo cu e doñonan di cas den e compleho y acuerdo pa uzo di e facilidadnan.
Cancha di golf ta existi 30 aña caba
Sun Development a construi y habri Tierra del Sol na aña 1992. Tabata un proyecto di Raymond Maduro, cu e tempo ey tabata unico y innovado. Tabata e prome cancha di golf di 18 buraco pa nos isla, atraendo un mercado elite cu ta biaha pa pasa vakantie solamente na destinacionnan cu tin un golf-course. A combina e cancha cu un proyecto di propiedad, restaurant, piscina y mas. A bende e compania cu varios grupo pero e ultimo tabata di un grupo, cu e comerciante local Maarten van Romondt como e cara local. Na varios ocacion e compania a hera bay bancarota y tabata necesario pa bin inversion di afo.
Inversion aproba: Pronto lo cuminsa renoba
Durante nos bishita na Cancun, e hefe cu ta opera tur e canchanan di golf di Iberostar a sigura di a inspecciona Tierra del Sol caba y tin un plan completamente diseña, cla pa pone den practica. Gerencia di e compania a aloca fondo caba y pues ta cla pa start construccion. E berdad ta cu e ultimo decada a haci poco of casi nada na mantencion. E cancha di golf a bay hopi atras y awo mester un inyeccion miyonario pa por pone na e nivel desea. E idea ta pa e reapertura di Tierra del Sol sosode simultaneamente cu apertura di Iberostar Grand Aruba den zomer di otro aña.
Tocante Tierra del Sol
Por topa e proyecto di clase halto na 2 kilometer leu di Arashi y na 14 kilometer leu di Aeropuerto Internacional Reina Beatrix. E ta conta cu un tereno di 243 hectar. E condominionan elegante di 2 pa 3 camber ta conta cu flat screen tv, Wi-Fi gratis, washer y dryer. Algun di nan tin terasa cu dak, balcon y/of un bunita bista pa lama of e campo di golf. E villa di 2 pa 4 camber tin pool priva. E casnan traha a base di peticion tin area pa barbecue. Parkeerplaat ta gratis, mescos cu e servicio di transport di aeropuerto y lama. Tin un restaurant y un bar. Algun otro comodidad cu e ta conta cu ne ta gym, un pool den e area afo, tennis court, un spa, un golf course di 18 buraco y un espacio pa train.
AHATA: Porfin lo renoba e golf course
Un di e miho noticia cu e asociacion di hotel y turismo a scucha durante e biahe aki ta cu lo renoba e cancha di golf na Tierra den Sol na Aruba. Ey tin hopi inversion pendiente pa hiba e proyecto na e siguiente nivel di crecemento y desaroyo. Cu loke a scucha durante e biahe, Iberostar tin plan pa haci un inversion cuantioso den e cancha di golf pa drech’e y prepar’e pa por ta na e mesun nivel di e otro canchanan di Iberostar. “Esey pa mi ta un bon noticia. Nos mester di dje”, asina Tisa LaSorte a bisa.
Un otro tema cu AHATA a atende ta e asunto di recurso humano. Nan ta consciente di e scarsedad enorme di recurso humano pa traha den hotelnan. Ta spera cu Iberostar ta logra emplea e cantidad di personal necesario pa cumpli cu e nivel di servicio di nan obhetivo.
Pa loke ta e nivel di mantencion, Tita LaSorte-Henriquez no por a sconde di a keda masha asombra. E hotel no ta solamente ocupa cu mantencion di coreccion sino mas bien preventivo. Y e echo cu nan maneho ta basa riba leynan di sostenibilidad ta haci nan mas interesante. Tur loke por ta recicla of reuza.
Na final Tisa LaSorte a sigura cu locual el a mira na Cancun ta expectacular. E ta impresiona cu e nivel di servicio y amabilidad di e personal, na tur nan hotelnan. Di berdad nan ta laga bo sinti na cas, banda di un trato excepcional y superior.
Tocante Iberostar
Iberostar Group ta un compania turistico global como tambe grupo hotelero. E compania tin cuater area di haci negoshi: E division di hotel, club di vacacion yama The Club, turismo di yegada y di salida bou marca (brand) di biahe Almundo.com, World 2 Meet y Iberoservice y negoshi di propiedad.
E compania su trademark ta ‘first line’ hotels, cu ta nifica directamente na beach y rondona cu hardin. Funda na 1956 na Palma, Spaña cu aproximadamente 28 mil trahado.
Propietario di Iberostar Group ta e biyonario Spaño, Miguel Fluxa Rossello, di tres generacion di heredero di negoshi di sapateria.
E oficina central di Iberostar ta situa na Mallorca, Spaña. Hotel cu ta resorta bou di nan cadena ta localisa na Europa, Norte America, Latino America y Africa.
