Quota Club tabata di bishita na Cruz Cora Aruba pa un oportunidad cu a haya pa conscientisa y alabes haya un bunita gesto di Quota cu ta haci un donacion di earplugs reusabel pa e boluntarionan di Cruz Cora den carnaval.
E aña aki pa Cruz Cora ta importante pa yuda crea conscientisacion riba e hecho cu oido ta algo hopi importante, principalmente di e muchanan, pero tambe cu ta bay green. Basicamente tur caminda ta mira earplugs benta riba vloer durante carnaval, riba aya cu ta deshaci di nan despues cu no a uza nan di e forma adecuadamente.
Cruz Cora ta pidi pa e sosten pa e campaña di Quota pa acerca e miembronan di Quota tur caminda y cumpra bo earplugs delanta, pa e muchanan en particular.
Cruz Cora tur aña ta purba di conscientisa pa cuida e muchanan durante e parada y otro eventonan, ya cu hopi biaha ta mira cu muchanan chikito no tin ningun necesidad pa bay pasa durante tur e oranan ey den solo, musica duro, hendenan cu por ta nan no por comporta nan mes despues, disfruta di hopi bebida alcoholico.
Diahuebs atardi, Cruz Cora ta hopi gradicido na Quota, mirando cu nan tin hopi aña di colaboracion. E aña aki tabata uno importante pa Cruz Cora tin un cambio y kier pa e boluntarionan sa di e cambio y pa nan bay carnaval adecuadamente.
Anthony-Pereira a comenta cu e earplugsnan cu nan lo ta hayando ta pa nan haci uzo durante e simannan di carnaval y ta gradici Quota, den nomber di tur e boluntarionan y hunto ta bay cuida nan oido y tambe yuda Quota pa trece e mensahe p’adilanti pa cuida e oido di nos muchanan y tambe di nos tur.
Quota
Di parti di Quota, presidente Ivy Simon, a comenta cu na momento cu Cruz Cora a manda un peticion pa earplugs pa e boluntarionan, nan no a basila. Ta un relacion hopi bunita entre e dos instancianan cu principalmente na comienso di e temporada di Carnaval, Cruz Cora t’ey pa conscientisa no solamente e oido, pero ta admira e trabao cu nan ta haci henter aña.
Ta pa e motibo aki mes Quota no a duda pa haci e donacion ora cu a aserca nan pa cumpra cierto cantidad di earplugs. E ora Quota a dicidi di aporta cu un caha di earplugs como donacion pa Cruz Cora. Quota ta sumamente contento pa bisa cu apart di e miembronan cu ta cana boluntariamente durante e paradanan ta bende earplugs, e miembronan di Cruz Cora t’ey pa esaki tambe pa apoya Quota.
Door di esaki a dicidi pa regala 50 earplugs pa mucha, cual nan a caba di haya di WEB. Simon alabes a menciona diadomingo lo tin e parada di blaas. Quota lo bay t’ey den tur e paradanan cu ta bay bin.
Nan lo purba di bay e paradanan di anochi. Sinembargo nan ta contento cu e lidernan di grupo ta yama pa nan haya nan earplugs.
Den e ultimo añanan Quota a drenta scol y duna charla, gradiciendo tambe e scolnan cu a cuminsa yama.
Tambe nan tin WEB ta contribui cu Quota den nan charla. Tambe tin fundacionnan cu Quota a bay duna charla. Nan bay Biblioteca tambe. E schedule ta yen.
Nan ta purba di conscientisa comunidad atrabes di scol y e organisacionnan di comunidad.
Esnan interesa por yama, pero semper y cuando nan ta yega ora cu por yega, mirando cu tin ta traha den dia. Toch tin un grupo extenso cu por yuda haci esey.
Quota ta gradici Cruz Cora no solamente pa Quota, pero pa tur trabao cu nan ta haci.
