Taskforce Bedrijven Covid-19, encarga cu controlnan riba e reglanan pa controla e pandemia di coronavirus den e sector comercial ta informa di e establecimentonan cu a cera debi cu nan no a cumpli cu reglanan di protocol y MR ( Ministeriële regeling).
Yen Yen Bar Restaurant na Kamay 8; e musica demasiado duro, tawatin demasiado hende den e luga y tambe mal comportacion di DJ. A cera e restaurant y a detene e DJ.
Well Well Restaurant na Sero Biento 3-A.; Aki a constata durante control cu tabatin demasiado hende paden y pafo, paden no tabata cumpli tampoco cu ningun di e reglanan DVG y articulonan stipula den MR.
Piccolo na Avenida Alo Tromp 7; A constata aki cu tin hende sinta na bar ta bebe y pafo tin demasiado hende na mesa. E musica tambe tabata demasiado duro y tabatin clientenan paden sin tapaboca.
Gleny’s Corner na Avenida Alo Tromp 22-A tambe a haya bishita di e team di control di Taskforce Bedrijven y a constata cu e sitio tabata yenyen di hende, no tabatin hende na porta pa informa clientenan cu e luga ya ta yen, no tabata cumpli cu reglanan di DVG, e distancia entre mesanan y distancia entre mesanan tampoco tabata corecto, pues a cera e lugar.
Komedo na L.G. Smith Blvd 108; A cera e sitio aki ya cu nan no por a mustra ningun vergunning pa nan por tin actividad na e sitio.
Lets Chill Cafe na L.G. Smith Blvd; Aki a constata cu paden tabatin hende para na bar ta bebe, cual ta contra reglanan stipula.
Yolo Cocktails & Tapas na J.E. Irausquin Blvd 384; Aki a constata cu e musica tabata hopi duro, tabatin bailamento, cantidad di hende sin tapaboca, demasiado hende para na un mesa, siguridad di e sitio a stroba miembronan di Taskforce pa haci nan trabao.
Hoya den Havenstraat rib Plaza Daniel Leo; Aki a constata pa di dos dia sigui cu e musica tabata demsiado duro, Taskforce a ordena e sitio pa paga e musica completo pero a permiti e sitio keda habri.
Ta spera cu e establecimentonan concerni y tur otro compronde cu mester cumpli cu reglanan di Protocol di DVG y e articulonan stipula den e MR pa asina nan proteha nan mesun clientenan y pueblo di Aruba engeneral.
