Tin un situacion preocupante cu e cachonan cu ta cana riba caya. Hopi di e cachonan aki ta sterilisa of capa, naturalmente cu ayudo di organisacionnan manera Crijojo Trappers, cu ta zorg pa gara nan, laga sterilisa nan y despues laga nan los bek.
Centro pa Control di Cacho supuestamente t’ey pa yuda controla e populacion di cacho, pero no yega y mata nan.
Segun presidente di Crijojo Trappers, Jacqueline Bodery, recientemente a coy cinco cacho di Monte Verde na Hooiberg y kier a mata nan. Crijojo Trappers a percura pa nan haya cas y un otro bay Merca. Awo nan a bolbe coy un otro grupo cu tambe ta sterilisa y poni bek riba caya na Cura Cabay. Awo a bolbe sosode cu nan kier a mata nan mesora.
Tin un di e bisiñanan cu a tuma contacto cu Crijojo Trappers, y pidi nan pa haci algo. Awo parce cu e grupo aki ta conoci, mirando cu a opera nan caba. E biaha aki CCC a bay cu un cacho cu tin doño.
Bodery ta sigui conta cu CCC a laga sa cu cachonan di caya por keda riba caya cu informacion riba dje, pero si nan caba den CCC, nan lo duna nan 10 dia si nan tin un chip of tres dia si nan no tin un chip y otro hende por scapa nan bida y duna nan un luga.
Despues ta pone nan drumi si un hende no bin pa rescata nan. Bodery no ta compronde dicon ta piki cacho di caya. Esey no ta yuda cu nada. Opera tur bestia. Si tin menos bestia por cuminsa bisa hende pa percura pa e cacho keda den cura. Si no ta coy nan y si no bin pa nan, ta mata nan.
Pero no ta cuminsa cu esey so, Bodery a comenta. Ta cuanto bestia mas nan kier mata, el a puntra finalmente.
