Un caso preocupante a tuma luga awe merdia riba caretera na momento cu un ambulance mester a tuma un criatura over for di auto particular y transport’e cu maximo urgencia direccion hospital.
Aproximadamente 1:00 pm a pidi ayudo di polis pa un caso caminda cu un criatura di entre 2 cu 4 aña, a bira malo na un scol den area di Hooiberg. Situacion tabata asina serio cu a opta pa transport’e y no warda pa ambulance.
Mientrastanto a activa tanto districto di Playa como esun di Noord pa localisa e vehiculo y asina duna espacio pa ambulance presenta y tuma over. A cera diferente rotonde en buskeda di e Honda Civic blanco cu tabatin e criatura aden. Na altura di rotonde Watty Vos Boulevard na Tanki Leendert (Cas Casuela) a logra topa cu e vehiculo y asina pas’e over pa ambulance cu tambe tabata presente caba.
For di aki a cuminsa cu e transportacion di maximo urgencia te hospital. Por a tuma nota di e diferente rotondenan cera pa polis pa asina facilita e pasada di e ambulance. Na yegada a asisti e criatura mesora. A tuma nota tambe di presencia di slachtofferhulp cu a yega na Spoed Eisende Hulp (SEH) pa brinda sosten na famia.
Informacion adicional a drenta despues cu e criatura lo a haya un aanval relaciona cu nivel di sucu. E sucu lo a subi di tal manera cu a pone e criatura su curpa shut down y confronta problema serio. Un dado momento a informa cu e criatura no tabata reacciona ni hala rosea cu a pone cu a mobilsa tur autoridad posibel. Te na e momento aki e criaura ta stabil, segun vocero policial.
