Dialuna ta habri cu e update di Departamento di Salud di Aruba indicando cu lamentablemente dos persona mas a perde nan bida relaciona cu Covid-19. E total di casonan di fayecimento ta aumenta na 20 persona awo. Palabra di forsa y condolencia ta bay na famia di e fayecidonan.
Resumen di awe september 14, 2020 ta duna di conoce cu 24 persona mas a recupera.
Pa locual ta trata casonan nobo esaki a baha drasticamente te na 14 caso nobo di Covid-19, tur caso registra ta di personanan cu ta residente. Por papia awo di un total di 1474 caso activo.
Pa locual ta testnan efectua te cu haci ayera ta conta 266, di cual 52 test ta haci na laboratorio di hospital.
Mientrastanto Hospital ta informa cu tin un total di 35 persona interna di cual 10 ta den cuido intensivo y 25 ta isola riba piso general.
