Desde e ultimo oranan e situacion na Hospital ta birando un poco mas serio, despues cu a cantidad di pashentnan a subi awor na 41. Parce cu entre e pashentnan interna, tin un mucha di apenas 12 aña di edad, cu a bay asina atras cu dokternan a dicidi di intern’e pa por observ’e di cerca debi cu e tin “Respiratory insufficiency”.
Den pasado tabatin dos mucha cu tambe a yega di interna, entre otro un baby, pero cu no tabatin sintomanan di problema cu pulmon. Mas bien nan tabatin otro retonan di salud y tabata contagia cu Covid tambe. Pero den e caso specifico aki di e mucha malo, el a contagia cu Covid, cu a conducie na retonan serio cu su pulmon y halamento di rosea. Pa hospital di Aruba, esaki ta e prome mucha cu ta bira malo debi na Covid. E mucha ta riba piso di Covid pero no ta interna den ICU.
Por lo menos un specialista a skibri riba Facebook cu a interna dos pashent mas den ICU cu lo laga e capacidad na un so, aunke cu den e lista di Hospital ta papia di 13 pashent so den ICU. Mester tene cuenta cu eseynan ta pashentnan di Covid so, pues no ta conta otro pashentnan cu otro enfermedadnan. Di acuerdo cu Hospital, di ayera pa awe a drenta 1 pashent mas cu Covid den ICU.
Mester menciona cu Respiratory insufficiency ta referi na un condicion den cual ta reduci e capacidad di bo curpa pa realisa intercambio di gasnan, cu ta inclui enfermedad di pulmon cronico, conoci como COPD. Ta un enfermedad di pulmon progresivo cu ta inclui “emphysema” y bronkitis cronico. E enfermedad por conduci na retonan di salud manera asma y enfermedadnan genetico straño, manera “cystic fibrosis” cu na su turno por provoca COPD.
Na henter mundo a raporta relativamente poco caso di muchanan contagia cu Covid-19, cu ta e enfermedad causa door di e Coronavirus yama “SARS-CoV-2”. E contagio mas bien ta aumenta cu e edad. En general, mas jong e muchanan ta, menos importante ta nan rol den plamamento di e virus aki. Mucha no ta bira mucho malo cu e virus, pues casi no ta haya sintoma mes. Casi nunca ta scucha cu ta interna un mucha pa motibo di Covid-19. Na Hulanda tampoco no tin mucho caso raporta di muchanan cu a interna den hospital.
Mester menciona si cu na Hulanda, despues di zomervakantie aña pasa, e casonan a plama tur rond di e pais, cu consecuencia cu a nota un aumento den contagio na tur nivel y cu tur edad, incluyendo muchanan. Ey por ehempel e nota aumento drastico di casonan bou di hobennan entre 13 pa 17 aña. Hasta asina e muchanan mas jong no a bira un problema pa plamamento di e virus.
Awor, cu surgimento di variantenan di Covid-19, parce cu algun di nan ta mas contagioso cerca muchanan. Como cu e variantenan ta relativamente nobo, no conoce nan forma di plama mucho bon ainda ni e consecuencia cu nan tin cerca e muchanan. Tur loke expertonan sa ta cu nan ta mas contagioso y den algun caso hasta mas peligroso. Ta pesey, awendia cu tanto variante, ta pidi tur hende pa cuida curpa y mantene na e reglanan vigente, cu ta inclui muchanan tambe!
