Tur cos tabata nobo y confuso e aña cu a pasa. Y servicio di ambulance di IMSan, tambe mester a adapta na e normal nobo aki. Ya for di comienso caba y sin mucho informacion nan mester a deal cu ne, a pesar cu esaki a trece inkietud bao di e personal.
Hefe di servicio di ambulance, Liberato Hoek ta bay bek un aña atras, recordando cu nan mester a adapta na material, buscando cosnan extra y tambe mester a sigui cierto entrenamentonan y no tur cos a bay facil, en particular, e parti di reanimacion.
Facil e no tabata pa adapta, segun Hoek. Mester a busca paknan special y tambe mester a prepara nan mes bon, mirando e miedo cu tabata reina pa keda infecta cu e virus riba su mes.
E pandemia sigur no tabata algo cu ningun hende a premira, pero asina mes, nan tabatin cierto plannan na nan luga. A pesar cu cos tabata diferente, asina mes mester a adapta.
Informacion sigur ta keda importante, vooral riba e sintoma nan. Banda cu hopi cambio a bin den e aña cu a pasa, ainda por nota varios cambio y tin cu sigui ta prepara pa e resto di lunanan cu ta bin. Hecho ta cu servicio di ambulance ta keda actualisa nan mes, mirando cu e situacion no lo bay cambia.
Un cos cu Hoek a menciona por ultimo ta, pa djis keda cumpli cu tur protocol stipula pa DVG, esta bistimento di tapaboca, labamento di man, uza handsanitizer y mantene distanciamento social.
