E ta un temporada cu pueblo ta sali masalmente pa biba nan cultura. Carnaval ta e fiesta cultural mas grandi riba nos isla. E aña aki ta celebrando e di shete decada di carnaval, pa cual, lo mester ta un celebracion grandi.
Sinembargo pa por lo menos e di cincuentidos edicion di tumba, a nota poco interes di e tumberonan pa cu nan inscripcion. Riba diaranson anochi, SMAC tabata na Balashi Beer Garden wardando e musiconan bin inscribi. Na dado momento tabatin mas miembro di prensa, radio, miembro di SMAC compara cu participante mes.
Edward del Orbe di 24ora.com a combersa cu e poco participantenan cu a inscribi. Del Orbe a nota presencia di Grupo di Amigo kende ta bayendo cu algo mas di dos participante, Hubert Ras, Rolindo Dortalina y pa prome biaha a nota comediante Tyson Croes tambe a haci su debut pa cu e festival.
Ta sperando un resultado final for di SMAC pa cu e participacion, pero te cu awo no a ricibi esaki. Tin cu bisa si, e bandanan mas grandi riba nos isla cu sa participa esta One of a Kind, Buleria, D-Licious, Robert y su Solo Banda te unda nos a nota, no a participa. Ta spera cu SMAC haci mas incentiva pa atrae e tumberonan pa participa.
