Tur hende tabata pendiente pa e sentencia den e caso civil andando di e bisiñanan den Lago Colony contra Gobierno di Aruba. Aunke cu e mesun Corte a fiha e fecha di 5 di juli 2023 pa e sentencia, toch na final a opta pa pospone e veredicto. No a menciona un otro fecha pero como cu Corte a baha cu vakantie awe, ta spera sentencia awo te aki seis siman pa dos luna. Esaki ta un sla duro pa e desaroyadonan di e proyecto.
Mester menciona cu ya caba henter e proyecto ta coriendo laat den nan agenda, primeramente debi na Covid pero tambe despues door di proceduranan civil andando den corte. Corte a reconoce por lo menos dos bisiña, un pensionado y un abogado, cu nan tin derecho pa protesta contra e permiso di construccion cu DOW a otorga. Nan ta keha di ta perde bista, biento y cu nan balor di cas y tereno lo baha.
Algun siman pasa Corte di Prome Instancia a tuma un decision riba un peticion di LAR di habitantenan di Sero Colorado representa pa abogado mr. Maritza Boyce, contra Minister di Infrastructura mr. Evelyn Wever-Croes representa pa mr. V. Emerenciana (DWJZ) y contra e compania Three Rivers Real Estate representa pa abogado mr. Anthony Ruiz.
E caso tabata pa hues ordena e compania pa stop cu e trabounan di construccion pendiente un caso den corte, pero e hues a ripara cu, de facto, e trabounan mester tabata para for di februari 2023 caba!
Obstaculo cu ta stroba desaroyo
Mientras cu dos bisiña ta insisti riba nan bista y no ta desea di bende nan propiedad, henter un desaroyo pa San Nicolas y pariba di brug ta secuestra huridicamente. Pio ainda, e problema no ta ni cu e desaroyadonan Spaño, sino mas bien cu e maneho di DOW, cu ta esun cu a emiti e permisonan di construccion. E bisiñanan ta bou di e impresion ci DOW a otorga e permisonan basa riba informacion robes of falso. Cu esey a logra convence un hues pa para e trabounan parcialmente. Tipo di maniobranan asina ta spanta inversionistanan cu kier inverti of desaroya un proyecto riba nos isla. Ta obliga bo cumpli cu un lista largo di rekisito y despues ainda bo ta core risico cu por para e proyecto.
Un hende lo paga daño y perhuicio
Sea ta DOW (Gobierno di Aruba) of e bisiñanan, pero e tardansa den e proyecto aki, normalmente, ta traduci den gastonan extra pa e inversionista. Hopi biaha e banconan of esunnan cu a fia placa pa e proyecto, ta traha cu un plan. Tanto tempo ta pone e placa disponibel y despues di tanto tempo mester start operacion y mester mira placa drenta pa baha e debe. Pero den e caso aki, cu cada bes bisiñanan ta purba inventa un otro motibo pa stroba e proyecto, lo tin repercucion riba e tasa di interes pa e fiansa of te hasta cu banco por “call the loan”, esta cancela henter e fiansa y exigi pago de inmediato. Ta den e cuadro aki fuentenan yega na e proyecto a sigura cu lo tin chens grandi cu lo exigi daño y perhuicio, pa ganashinan perdi pf tardansa den e plan di negoshi.
Hyatt Regency lo maneha Secrets Baby Beach
Locual hopi hende no sa, of kisas no ta realisa, cu Hyatt Regency a cumpra e compania hotelero cu lo opera e hotel. Three Rivers Real Estate como tal lo ta e doño di e edificio pero operacion diario di e hotel lo ta hunto cu e cadena Hyatt, cu lo uza su plataforma di reservacion pa tur su miles di huespednan.
Tocante Secrets Baby Beach Aruba
Tabata na november 2019 cu AMResorts®, un compania di Apple Leisure Group® (ALG), a anuncia un acuerdo nobo pa construccion di 600 camber pa e proyecto Secrets Baby Beach Aruba situa cerca di Baby Beach, na San Nicolas, como parti di e cadena di Secrets® Resorts & Spa. E grupo tras di e proyecto ta Grupo Martinón, estableci na Aruba via e compania Three Rivers Real Estate VBA.
E intencion ta pa traha 600 camber prome, evalua e proyecto y despues amplie cu 300 camber mas! Ora a anuncia e proyecto na november 2019, a bisa cu lo cab’e na final di aña 2021. E proyecto completo ta costa alrededor di 200 miyon dollar Mericano. Pero, pandemia y despues batayanan legal den corte ta haci cu awe na 2023 ainda falta bastante ainda pa por finalisa e hotel gigantesco aki!
E hotel ta destina solamente pa adulto y lo ofrece e concepto conoci como un vakantie exclusivo “Unlimited-Luxury®”, cu ta cubritur e opcionnan di cuminda y servicionan den e hotel, cu ta inclui oferta di cuminda estilo “gourmet a la cart” sin reservacion, servicio di cambernan y roomservice 24 ora pa dia, bebida sin limite, mini bar den camber, actividadnan y entretenimiento nocturno “live”. Y tur e servicio y actividadnan aki ta inclui, pues no mester ni sali cu tas of cartera!
E grupo Apple Leisure Group® (ALG) ta un di e companianan principal di tours, biahe y hospitalidad di Merca. Via su compania AMResorts® nan a desaroya of ta desaroyando proyectonan hotelero grandi den Caribe.
Siendo un compania reconoci como un lider den e mercado di hotelnan “All Inclusive”, awendia AMResorts® ta maneha 66 hotel di e marca aki cu como 9000 camber den pleno desaroyo. E compania ta posee como 24000 camber bou varios marca di hotel na Mexico, den Caribe, Merca y Spaña.
