Corte: A prohibi SIMAR tambe di bay den accion

20 April, 2022, 9:19 pm

Manera sindicato SEPPA, sindicato di docentenan, esta SIMAR, tambe a ricibi e sentencia di corte riba e caso cu tin entre nan y gobierno. E resultado aki no tabata loke nan a spera ya cu Corte a prohibi SIMAR pa bay den cualkier tipo di accion pa insisti na gobierno pa stop di kita e 12.6%. Tambe nan no por bay traha menos cu 40 ora pa siman, di cual nan tabata kier a traha 35 ora semanal.

Gobierno y algun sindicato tabata na mesa pa asina purba yega otro pa loke ta trata e 12.6% cu ta kita dje salario di e ambtenaarnan. Gobierno a bisa na comienso di henter e situacion di entrega 12.6% cu esey tabata pa yuda esunnan cu a bay atras den entrada. Aki a bin FASE y Loonsubsidie, pero aña pasa esaki a yega su fin. Esey a pone cu e sindicatonan cu tabata na mesa cu gobierno a pidi pa stop di kita e porcentahe aki, di cual gobierno a bisa na varios ocasion cu esey no ta posibel. E sindicatonan a cuestiona varios biaha e motibo cu no ta kita esaki, ya cu no tin FASE mas.

E sindicatonan aki no ta di acuerdo cu gobierno y a mustra esey door di manifesta. Despues di tur manifestacion, gobierno a lanta un caso contra sindicato SIMAR. Esaki tabata a base cu a protesta, e sindicatonan a informa cu e ambtenaarnan no ta bay traha tempo completo pero ta traha tanto ora y esaki ta ekivalente na e 12.6%.