Desde awe e entidadnan resortando bou di ENNIA di Ansary Group ta bou mando di Banco Central di Corsou. Hues a bay di acuerdo cu peticion di Banco Central pa implementa un “Noodregeling” contra e compania di seguro. Pa awo esaki tin di haber directamente cu e operacionnan na Corsou pero indirectamente cu Aruba tambe, pasobra e “Holding Company” bou unda Aruba ta resorta tambe ta bou mando di Banco Central di Corsou awo. E mesun compania aki ta doño di Banco di Caribe tambe.
Na aña 2006, Hushang Ansary di 92 aña di edad a cumpra ENNIA for di Delta Lloyd di Hulanda. Ansary tabata Minister di Finansa di Iran y despues Embahador di Iran na Merca. E ta doño di companianan di gas y petroleo y como tal tin hopi placa y bienes.
Pero, na aña 2010 a saca placa di spaardonan di pensioen na ENNIA a cambio di un tereno na St. Maarten, hincando e compania di seguro den retonan di “cashflow”. Banco Central di Corsou a atende cu nan y a duna nan guia den con restructura e compania, pero sin mucho resultado.
Pa loke ta trata Aruba, mester menciona cu Banco Central di Aruba ta hiba un maneho stringente cu companianan di seguro. Na mas di un ocasion a menasa di tuma accion y mesora ENNIA tabata core deposita e fondonan cu falta pa garantisa e seguronan y pensioennan. “Pero ki ora cu BCA pone presion, nan ta saca placa di Corsou y asina ta haci e buraco ba Corsou mas grandi ainda”, asina un fuente bon na altura a splica nos. Asina ta tene e operacion na Aruba bou control a costo di Corsou.
Ta mustra cu den e ultimo añanan, e control di Banco Central di Corsou no tabata mes stringente cu awo. Ta sinti cu awor kier “haal in”.
Expertonan cu a analisa e decision di Corte di awe ta considera cu a pone e compania di seguro bou curatela. Nan mes lo nombra ehecutivonan den e compania cu un solo meta: Sanea e situacion financiero y saca e compania padilanti. E rol di Ansary lo bira cada bes menos, si e kier sigui mes cu e compania na Corsou. Ta pronostica cu probablemente lo bende Banco di Caribe pa asina genera entrada pa ENNIA. Na Aruba tabatin interes di Growth Fund, pero un ke otro no a cristalisa. ENNIA Aruba tambe tabata den wowo di otro compania di seguro pa cumpra e portofolio, pero tampoco no a sigui.
Den e decision por a lesa cu tabata intencion di Ansary pa saca 100 miyon dollar di e companianan, locual a haci cu Banco Central di Corsou y St. Maarten a dicidi di actua mesora.
E reto mas grandi ta cu ENNIA tin un portofolio grandi di pensioen. No menos di 25 mil pensionado ta cobra tur luna eynan di placa cu nan mes a spaar. Banco Central mester por garantisa e fondo di pensioen pa tur cu ta spaar y tur cu ta cobrando. Awor e no por duna e garantia ey y como tal ta hay’e obliga na tuma e medida drastico aki pa purba atrobe, e biaha aki cu mas autoridad, pa cambia rumbo di ENNIA.
