Mester pone un stop mesora cu Toque de Queda, esaki ta conclusion di un hues na Den Haag diamars. A introduci TDQ basa riba un ley di emergencia, pero segun Corte, e TdQ no ta cumpli cu e exigencianan di “motibonan di emergencia”.
Esaki ta nifica cu a kita TdQ tambe. Segun vocero di Corte, tin chens di bay den apelacion ainda, pero cu ta kita TdQ te ora cu un otro Hues dicidi diferente.
Tabata “Viruswaarheid”cu a cuminsa e caso y Corte a duna e grupo di protesta aki rason.
Gobierno di Hulanda a bini cu TdQ basa riba “Wet buitengewone bevoegdheden burgerlijk gezag” (Wbbbg). Den esaki ta para cu un gobierno den situacionnan di hopi urgencia por bini cu algo manera TdQ sin envolvi Tweede y Eerste Kamer.
Y esey a hustamente loke cu tabata falta, esta e urgencia. Cu no tabatin emergencia (urgencia) ta keda ilustra di e hecho cu prome cu introduccion di e TdQ tabata papia di medidanan mas fuerte. No tabatin bon argumentonan pa e TdQ. No a proba e efecto di esaki y e presion riba cuido na menos compara cu na inicio di coronavirus.
“Ta tempo di hopi preocupacion y di decisionnan dificil. Pero hustamente pa e motibonan ey medidanan profundo manera e TdQ mester ta bon basa riba ley.”
Pa e motibo aki Hues ta haya cu mester kita e TdQ. E pregunta ta: Kico ta bay pasa cu e boetnan imponi riba e asunto di TdQ.
Ministerio di Husticia y Siguridad ta bisa den un reaccion na prensa cu nan ta na altura di e decision y ta studiando e caso.
E TdQ cu ta valido for di 9’or di anochi pa 4.30 di marduga, a drenta na vigor dia 23 di januari. Personanan cu ta haci trabounan esencial so por ta riba caminda den e periodo ey. Otronan ta haya un boet di 95 euro.
E intencion di gobierno cu e medida aki tabata evita mas plamamento di e virus. Na su introduccion el a causa disturbio na e pais.
E TdQ lo a keda na vigor te cu 3 di maart pa 4.30. E intencion ta pa dia 23 di februari awo, evalua un biaha mas e medidanan relaciona cu coronavirus y prolongacion di e TdQ mester a tuma luga dia 3 di maart. Attachments area
