Corte awe a tuma un decision den e caso cu Jan de Ruijter a cuminsa contra pais Aruba. Esaki ta relaciona cu pago atrasa cu e no a haya te na momento cu a entrega e caso aden.
Durante tratamento di e caso, representante di Gobierno a mustra riba e hecho cu de Ruijter no tin urgencia pa cuminsa un kortgeding, mirando cu e ta disfrutando di un pensioen Hulandes tambe. Esaki naturalmente a wordo contradeci door di Ruijter. El a splica Corte cu e mester di e placa, pasobra e ta cayendo atrasa cu cierto pagonan cu e mester haci. Ademas, ta conoci semper di su bida el a traha internacionalmente y e unico pensioen cu e tin ta esun di Aruba.
Hues a analisa e caso y dado momento Abogado di Gobierno a bisa cu a haci un pago caba. Sinembargo den esaki a surgi un confusion, ya cu ta papia di pago di un trabou cu el a haci pa partido y esey no ta esun cu e ta cobrando awo sino esun relaciona cu cursonan na EPI.
Na final a dicidi cu den tres dia di tempo mester paga de Ruijter e suma di 4600 florin.