Diabierna a habri cu hopi hende deteni na momento cu Cuerpo Policial di Aruba, Aduana como Cuerpo Especial Arubano (CEA) a uni forsa y efectua un control nacional. Na diferente warda di polis por a tuma nota di transporte di CEA ta trece detenido.
Rond Aruba a mira diferente team ta move hunto y asina tene control y fouillering den diferente area conoci y frecuenta pa entre otro bendemento di droga como tambe esunnan problematico. Ademas di esey, a tene control riba documentacion y validez di entre otro rijbewijs.
Manera anochi a drenta, detencion a cuminsa. San Nicolas a tene den e prome rato un total di 10 persona. Hopi di nan relaciona cu droga y entre nan uno relaciona cu arma di candela. Transporte di CEA a yega yen yen y asina ey control a continua.
Pa locual ta trata Playa, aki tambe a mira accion. Diferente patruya a tene control dilanti ex-Bar A Bar den Driemasterstraat pa despues sigui un poco mas panort na ex- Las Caleñas den Madiki. Manera a termina eynan a bay direccion Manuelito’s Bar caminda un persona a keda deteni pa buracheria. Un rato despues a bay pa control den area di Budweiser Bar, parti patras como tambe den Rancho caminda cu sa tin actividad criminal sa tuma luga.
Durante control e Team di K9 di tanto Cuerpo Policial y Aduana tabata presente pa asina brinda sosten den e control nacional.
Por spera cu e accion aki lo continua durante e fin di siman y durante diferente ora di dia. Pa locual ta trata esun di diabierna, esaki a bay te den ora laat di anochi.
