Den pleno preparacion pa e eleccion cu lo tuma luga dia 25 di juni 2021, Presidente di Conseho Electoral ta informa comunidad di Aruba lo siguiente.
Carchi di voto
Riba e carchi di voto cu tur persona cu derecho di voto lo mester a ricibi awe caba, e biaha aki lo tin un QR code. E QR code aki ta pa yuda e eficiencia di e proceso di registra un persona cu a presenta pa vota. Esaki normalmente ta sosode na man den e Registro di votado di cada urna.
Despues di e proceso di identificacion y registracion, un votado ta haya e stembiljet for di e Presidente di Urna, cu mescos cu semper ta blanco y no tin di ningun forma un conexion cu e identidad di e votado. E votado ta bay cu e stembiljet den e hoki y ta marca cu e potlood cora e candidato cu e kier duna su voto, y despues ta dobla su stembiljet y deposita esaki den e buzon.
Sugerencia di orario
Debi na COVID-19 y pa evita aglomeracion, a haci preparacionnan di antemano. Pa e motibo aki riba e carchi di voto e biaha aki tambe tin un orario sugeri pa yega na e urna electoral. Ora mayoria di persona acudi na e urna riba e ora di sugerencia, lo por evita cu tin aglomeracion durante e dia di eleccion na e urnanan. Esaki ta importante pa evita contagio di coronavirus. Tene bon cuenta cu esaki ta un sugerencia y NO un obligacion. Si no ta posibel pa e votado yega na e urna na e ora sugeri, por acudi na urna libremente entre 8’or di mainta y 7’or di anochi. Si tin diferente persona cu ta biba hunto cu orario diferente, ta recomenda pa yega hunto riba e ora di sugerencia di e persona cu ta mas conviniente pa esunnan cu ta biba hunto.
Registro di votado
A tuma e decision cu no lo duna e partidonan politico copia di e registro di votado cu tur informacion personal y sensitivo di 70281 votado. E rason tras di e decision aki ta, cu ademas cu e no ta necesario pa e control cu lo mester a sosode antes ora tecnologia di identificacion no tabata tan avansa y e partidonan tabata tin un control social den bario, cu Pedro no ta Pablo, e registro aki ta contene informacion personal sensitivo di 70281 votado, acumula pa servicio di Censo di pais Aruba. Pa un bon organisacion di nos eleccion, control di identidad di e votado cu ta yega urna electoral, y uzo di e derecho di voto solamente un biaha, no tin necesidad di sosten di checkers manera antes. uzo di identificacionnan moderno y uzo di registronan electronico moderno y tecnologia certifica y avansa ta garantisa e proceso confiabel di eleccion y ta percura pa esaki, y ta den man di e Presidente y miembronan di urna.
Ora comparti e informacion personal aki cu un partido politico, ta perde di bista kico exactamente ta e forma y limite di uzo di e data sensitivo aki. uzo inapropia y contra nos derecho constitucional di voto liber, por ehempel busca un hende na su cas cu no a yega urna ainda, pa esunnan cu haya e data aki den nan man ta sumamente facil. uzo y analisis di e informacion personal mas sofistica cu esaki tambe lo ta posibel. E derecho di proteccion di data personal ta un derecho fundamental di sernan humano cu te cu aña 2017 no tabata tin proteccion di derecho internacional y legal mes fuerte cu awe. Ta responsabilidad moral di Gobierno di Aruba, di Conseho Electoral y di Censo pa minimalisa entrega di data personal di e populacion na tercera partidonan si esaki no ta necesario pa buena marcha di un proceso y den esaki pa e proceso electoral. Traspaso di e data no ta necesario pa un buena marcha den e eleccion manera nos por wak esaki na otro paisnan den Reino por ehempel Boneiro, St Maarten y Hulanda. E control por sigui den buena marcha cu of sin e presencia di checker paso tur hende sa cuanto votado tin na cada urna.
Finansa partido politico y candidato riba lista
Conforme e ley pa partidonan politico, desde prome di januari 2021 partidonan politico mester duna cuenta di nan finansa na un Comision finansa partidonan politico (Commissie financiën politieke partijen). E presidente di Conseho Electoral ta presidente di e Comision aki. Cerca di eleccion candidatonan riba lista y partidonan politico mester duna cuenta na e Comision di locual nan a haya di nan sponsor y donadornan. E Comision finansa partidonan politico a notifica e partidonan politico y candidatonan riba lista di nan obligacionnan y lo publica e informacionnan aki via di e website di Censo bou di e link Verkiezingen 2021 pronto.
