Diabierna mainta Corte di Prome Instancia a trata e caso contra conocido fotografo, Jason Margarita. A trata e caso Pro Forma. Es decir, cu no a trata e caso den profundidad.
ACUSACION
Tabata riba diahuebs, 25 di februari cu recherchenan di Jeugd- en Zeden Politie a sorprende y a detene Jason Margarita na su gym Perfect Me. E sospechoso ta naci na Corsou y tin 39 aña di edad, sospecha di ta tene relacion sexual cu mucha. Despues di oranan di interogacion, fiscal a ordena su encarcelacion pendiente e investigacion.
Margarita tabata consehero di partido POR, di ex-minister Otmar Oduber, di DIMAS, di radioemisora POWER FM y ta doño di e gym Perfect Me, cu ta riba nomber di su pareha, Julissa Rodulfo, miho conoci como “Julie Julie”. Ta eynan mes el a conoce un menor di edad cual el a cuminsa basila pa logra su proposito cu a bira un acoso sexual, te ora cu e mayornan a haya sa y a haci un denuncia.
Aparentemente pa placa, entre otro, el a logra convence e menor pa comete actonan inmoral. E mayornan di e menor a descubri e telefon di nan yiu ora cu a cuminsa sospecha cosnan straño. Aunke a purba deshaci di evidencianan, toch esaki no a logra full. Cu e pruebanan aki a logra haci un keho oficial na Jeugd en Zeden Politie cu a duna atencion na e caso aki tambe.
Asina a pasa e proceso di investigacion y tambe interogacion. Cu e informacion, pruebanan y evidencianan acumula a logra pone tur cos nechi riba papel. Cu tur cos bon documenta a sigui pa Ministerio Publico. Eynan fiscalnan a analisa tur cos y a dicidi cu ta duna autorisacion pa bay over na detencion. Esey ta loke a sosode y asina autoridad a pone man riba Jason Margarita.
TRATAMENTO DI CASO
Lo trata e caso contra Margarita dia 8 di october 8:30 am.
