Ta algo cu autoridad ta tuma cu tur seriedad ora cu comunidad ta informa cu tin personanan indocumenta ta purba drenta nos isla den forma ilegal. Esey mes tabata e caso dialuna merdia momento cu a tuma nota di un grupo di hende canando/ crusando caretera principal di Mahuma ( Green Corridor )
A mobilisa polis di diferente area pa bin asisti, pero un momento despues e accion/ esfuerso a keda cancela. E confusion aki ta algo cu a sosode den pasado caba, momento cu miembronan di Centro Aliansa Home den grupo ta sali pa nan actividad semanal, ta crusa caretera pa asina nan yega Centro di Bario Simeon Antonio.
E grupo aki ta miembronan di un centro pa adictonan cu ta bringa pa nan miembronan rehabilita den un forma sano cu actividadnan sano manera entre otro landamento y deporte. Pesey ta dirigi e grupo pa e Centro di Bario of pa lama cu ta relativamente cerca di e Centro di rehabilitacion. E biaha aki e grupo a haya un poco atencion di sorpresa pero igualmente ta manda saludo pa e comunidad y ta gradici tur cu ta pendiente di nan desaroyo positivo.
