Den cuadro di e celebracion anual di Dia Internacional di Derecho di Mucha riba 20 di november, Parlamento Hubenil Aruba (PH) ta organisa un ‘Debate & Speaking Championship’ pa hobennan entre 12-24 aña. E evento aki ta tuma luga diadomingo 20 di November pa 3:30 pm na EPI College Zaal.
E meta di e competencia di debate ta pa e hobennan haya oportunidad pa siña y practica abilidadnan pa debati na un manera respetuoso y al caso, cu e meta pa yuda e hoben den su desaroyo di bida. Participando den e seccion expresivo den palabra e hoben lo desaroya e capacidad pa presenta dilanti un publico y na mes momento sa con pa expresa su mesun pensamento y ideanan como hoben, segun palabranan di President di Parlamento Hubenil, Dave Martinus.
Martinus a comparti cu e topico internacional di e aña’ki ta Ageism of embehecemento of vergrijzing; algo cu tin den cada pais y ta buscando con pa cera e gap aki entre hobennan y hendenan grandi y saca e miho potencial. “Kisas hopi hoben ta pensa cu nunca nan a haci e cos aki, nan no sa con pa haci’e y e ta dificil. E no ta bay ta pa bo ta un profesional, e ta pa bo participa y test y purba.”
Ta enfoca hopi riba e hobennan entre 12 cu 17 aña y cu ta bay scol secundario ya e ora nan ta haya tambe oportunidad di cera conoci cu e parti aki cu ta bira parti importante di nan desaroyo. Martinus: “Parlamento Hubenil no ta pa muchanan cu kier bira político. Juist Parlamento Hubenil ta pa duna e hobennan oportunidad di desaroya nan mes como un bon hoben cu ta profesional anto esaki ta bay bira un herment pa nan uza den bida.”
Durante e dos simannan nos dilanti Parlamento Hubenil lo ofrece tur hoben un serie di diferente workshop pa asina prepara e hoben pa e campeonato final. Parlamento Hubenil ta duna e oportunidad aki na tur hoben, tanto pa esnan cu lo kier competi riba 20 di november y tambe pa esunnan cu djis kier siña.
CON PA REGISTRA?
Registracion ta habri y por haci esaki awe mes via [email protected]. Pa mas informacion por yama na 566-9333. Hoben, laga nos celebra Dia Internacional di Derecho di Mucha door di expresa nos mes! Laga bo bos resona! Un invitacion special ta bay na henter pueblo, stakeholders den veld social y mayornan, pa acudi na EPI College Zaal 20 di november 2022 pa 3.30pm pa apoya nos hobennan den nan desaroyo.
Pa e relato completo, lesa edicion di TREMPAN
