Comision di mayor di Reina Beatrix School a manda un carta pa prome minister, mr. Evelyn Wever-Croes. Den e carta aki nan a trece diferente punto dilanti referente mudamento di e scol for di YMCA Dakota pa Scol Paso Pa Futuro.
E comision di mayor ta bisa lo siguiente den e carta:
Pa medio di e carta aki, nos di comision di mayor kier a expresa nos preocupacion y desaprobacion cu e mudamento di eerste y tweede klasnan di Reina Beatrix School (YMCA) pa e edificio di Scol Paso pa Futuro situa den Uruguaystraat # 5 na Oranjestad. E mudamento aki a wordo confirma recientemente door di Dienst Publieke Scholen na cabesante di Reina Beatrix School. Nos comision a ser acerca door di hopi mayor cu hopi puntonan di preocupacion. Esaki a wordo formalisa cu firmanan di sosten di parti di mayornan pa demostra nan desaprobacion. Nos kier comparti algun di e puntonan aki cu lo tin un efecto directo y indirecto pa e bienestar di e nos yiunan.
Algun puntonan di preocupacion pa muda pa Scol Paso pa Futuro:
(tambe ilustra cu algun potret)
1. Condicion di e edificio cu no ta apto y sigur un peliger pa nos yiunan mirando cu tin vloertegels cu ta kibra/lanta, murayanan y pilarnan cu te gescheur. Pilar no ta djis scheur, kiermen e por ta un problema hopi mas serio. Nos kier sa si DOW ta na altura di e situacionnan aki y e peligronan cu esaki ta presenta pa nos yiunan.
2. Condicion di cura di scol, e hekwerk tin buraco y hasta patched. Esaki ta un peliger pa nos yiunan mirando cu no tin un muraya di bloki pa proteccion di nos yiunan.
3. Condicion di speelplaats su vloer cu ta un otro peliger pa kleuter y demas alumnonan di eerste y tweede klas. Asfalt a lanta na varios areanan unda nos muchanan ta tuma pauze door cu tin raiznan di un mata grandi cu ta lantando e vloer.
4. Presencia di prikkeldraad riba un cura cu por ta un peliger pa nos jufnan. Tambe tin un tanki di gas cu ta mucho cerca di e speelplaats y edificio. Tambe tin areanan cu awa para cu por causa dengue.
5. Limitacion di baño pa nos yiunan cu mester wordo comparti. Por ehempel 3 baño pa 150 alumnonan y educadornan. Bañonan cu sigur cu no ta aceptabel pa uzo mirando e situacion higienico actual. Ni pa e normanan di cantidad di baño cu mester tin pa cierto cantidad di alumno.
6. Mester comparti un edificio, baño, pauze y area pa hunga entre dos tipo di enseñansa kiermen un educacion primario (regular) y uno educacion primario (special). Un preocupacion ta cu nos yiunan entre 4 y 8 aña mester bay comparti cu otro alumnonan di edad mas grandi.
7. Lokaalnan na Scol Paso pa Futuro no ta apto pa un scol primario (regular) mirando cu e scol aki a wordo construi y structura pa un educacion special. Nos no ta wak nos yiunan den un klas cu un set up cu stoof pa siña cushina. No tin confirmacion si nos yiunan lo bay den klas of den trailer.
8. Nos yiunan lo por ser poni den lokaalnan riba di dos piso. Esaki ta un situacion sumamente peligroso pa nos yiunan. Nos como mayor no ta sinti confortabel cu esaki mirando nan edad (4-8 aña). Na Aruba (te asina cu nos sa) no tin un scol di dos piso cu tin kleuter, eerste y tweede klassen riba di dos piso.
9. Area di scol aki ta uno hopi frecuenta pa hendenan indesea (adictonan ambulante) y e structura di cura no ta uno cu ta brinda siguridad pa alumnonan di un scol primario. Porta nan di cura ta keda habri y/of tin acceso facilmente pa e edificio.
10. Logistica di trafico lo ta uno dificil mirando cu tin 6 scolnan total den cercania (within 2 blocks). Scol Paso pa Futuro su entrada na situa den un one way street y cu esaki lo ta un caos completo sigur mirando cu tin postkantoor y un oficina di Setar dilanti e scol aki. Esaki ta bira hopi dificil pa nos cu mester sali di un scol (kleuter, eerste of tweede) situa den playa pa bay busca nos otro yiu(nan) na un otro edificio (derde, vierde, vijfde y zesde klas) situa na Seroe Blanco. Tur esaki teniendo cuenta cu nos trabou y break.
Motibonan pa keda na YMCA
– Infrastructura y siguridad ta mas sigur y adecuado pa un scol primario.
– E klasnan ta den bon condicion y cu bon airco.
– E bañonan ta den bon condicion.
– E muchanan tin bon espacio pa tuma pauze.
– Tin un bon dak cu nos yiunan por practica deporte.
– Trafico ta mucho menos cu den centro di Oranjestad.
– Mayornan por yega hopi mas lihe di YMCA Dakota pa Reina Beatrix School na Seroe Blanco of vice versa.
Reina Beatrix School su situacion sin su propio edificio
– 2014: Reina Beatrix School (desde 1950) cu tin mas cu 50 aña den su propio edificio ta wordo saca pa otro localidadnan. Eerste y tweede klassen a bay YMCA na Dakota y otro klasnan a bay den DOC opleiding su edificio situa na Oranjestad.
– 2016-2017: Reina Beatrix School ta wordo saca di e edificio di DOC opleiding door cu e edificio aki tabata duna problemanan di salud. Reina Beatrix School a bay den un edificio situa na Seroe Blanco (ex De Schakel School). Mientras cu e otro parti di scol ta keda na YMCA.
– 2017: Dienst Publieke Scholen a menciona di muda Reina Beatrix School pa un otro edificio pero nunca a bira realidad.
– 2018-2019: Minister di Enseñansa a menciona di muda Reina Beatrix School pa su edificio original bek situa den George Madurostraat despues di renobacion. Esaki nunca a bira realidad y Stichting Monumenten Fonds Aruba ta pone un cello cu e edificio como uno protegi. Te cu awe e edificio original aki ta cera cu plywood sin cu algo a wordo haci.
– 2019-2020: Dienst Publieke Scholen ta bolbe menciona di muda Reina Beatrix School pa un otro edificio pero nunca a bira realidad.
– 2021: Dienst Publieke Scholen ta avisa y confirma directiva di Reina Beatrix School den porta di vakantie cu lo muda Reina Beatrix School pa scol Paso pa Futuro su edificio.
Nos di comision di mayor di Reina Beatrix School ta di opinion cu e mudamento aki no mester tuma luga mirando tur e preocupacionnan serio menciona ariba. Nos mayornan ta hopi preocupa y ta sostene nos pa pone un paro na e plan aki. Nos deseo ta pa nos kleuter, eerste y tweede klassen (6 klas total) keda na YMCA pa awor te ora cu nos haya un luga aceptabel pa full Reina Beatrix School como un scol primario.
Trabounan y cooperacion pa esaki bira un realidad ta pa busca dos trailer y pa instala coriente y airco pa nan. E dos kleuter klassen di Reina Beatrix School lo bay den e dos trailer. Esakinan lo wordo poni riba tereno di YMCA na Dakota. Nos di comision di mayor di Reina Beatrix School ta spera cu nos por yega na un resultado satisfactorio pa nos yiunan y nan maestranan. Nos ta desea y ta pidi un reunion urgente cu su excelencia pa por delibera riba nos peticion pa bienestar di nos yiunan, maestranan y Reina Beatrix School.
