Pa loke ta trata e scarcedad di docente cu tin na varios scol, Minister di Enseñansa Endy Croes a splica durante e conferencia di prensa ofreci diaranson mainta, cu e mesun comision cu ta ubicando muchanan sin cupo na e scol mas indica, tambe ta trahando pa dirigi docentenan caminda cu tin mester cu e obhetivo di no crea un desbalans den e sector. Den dicho comision tin representante di EPB, EPI, Dienst Publieke Scholen (DPS), Directie Onderwijs, Inspectie Onderwijs y Ministerio di Enseñansa.
Minister Croes a admiti cu tin scarcedad di maestro, pero cu esaki ta solamente den cierto materia (vak). A splica cu, semper na comienso di vakantie, e scolnan sa tin custumber di ranca un docente for di otro scol y bin cu ne. Croes ta di opinion cu esaki no ta soluciona e problema definitivamente pasobra ta yena un buraco, lagando otro atras.
“Tin X cantidad interesa pa bay otro scol. Pero ban busca balans, ban wak kico tin rond y hunto ta garantisa cu ora scol cuminsa, tin suficiente docente pa tur leervak y tur scol,” asina e titular di enseñansa a indica. Croes a declara cu diabierna awo lo ta ultimo reunion riba e tema aki y cu diabierna ultimo el a haya e bon noticia cu pa e siman aki lo keda cla cu tur vacatura.
Adicionalmente, tin un lista largo di docente cu a solicita, mas no ta tur ta fit pa e materianan cu tin mester. Actualmente ta den e proceso di match cada docente cu ta disponibel, cu e vacatura cu e scol tin mester. “E tin nos atencion den totalidad,” asina e minister a señala.
