Recientemente a informa pueblo di cu e prijs di gasolin lo bolbe conoce aumento drastico. Awe oficialmente prijs di gasolin a subi cu un total di 15.3 cen pa liter. Tur esaki ta consecuencia di aumento den e prijs di crudo mundialmente. Mas cu claro esaki ta bay trece su consecuencianan cu ne, entre otro, lo bay afecta prijs di tur cos rond mundo. Den un entrevista cu Herrick Henriquez, director di ATIA, el a bisa cu Aruba ta un isla cu ta importa tur cos, pues nos ta depende di prijs di crudo pa tur cos.
Segun Henriquez a splica, den pasado a realisa ‘hedging’ na WEB y den un situacion aki, e hedging dje barinan di petroleo aki lo tabata importante ya cu esaki lo a stabilisa e prijs. Tur esaki lo conduci na cu un y tur ta bay sinti e efectonan riba mercado. Pa loke ta e parti di comercio, Henriquez a bisa cu nan ta den un fase di recuperacion y ya caba e margennan di prijs ta hopi abou caba y den mercado competitivo esakinan lo keda baha, pues den un posicion asina no por bay absorba mas aumento di nan banda.
Asina Henriquez a bisa cu el a lesa un articulo di gobierno cu si prijs sigui subi nan lo bay aumenta esakinan gradualmente. Sinembargo, mester bay wak con esaki ta bay tuma luga ya cu gobierno ta den un deficit caba, pues no tin mucho espacio pa traha cu prijs y absorba como pais. “Na final di dia, t’e pueblo y comercio ta bay sinti esaki, pasobra prijsnan ta bay subi no door di comercio, pero door cu tur cos mundialmente ta subiendo”.
Pa un relato mas amplio lesa edicion di TREMPAN.
