Camara di Comercio no lo sostene un posibel aumento di BBO. Actualmente comercio ni pueblo no por carga nada mas, ta locual cu mr. Monica Kock a enfatisa.
Den entrevista cu Monica Kock, presidente di Camara di Comercio, el a indica claramente nan posicion riba un posibel aumento, sea riba BBO, BAZV of BAVP. No ta haci un diferencia unda ta hisa e belasting, por ehempel den BTW, BBO of grondbelasting, cualkier sea unda gobierno tin den proposicion pa introducie, comercio a yega su punto maximo caba.
Camara di Comercio ta di opinion cu no por aumenta nada mas mirando e situacion cu pais ta aden.
Di otro banda ta mira tambe, cu te na e momento aki, no a mira con gobierno tin pensa di baha su gastonan. A haya un presentacion di cuanto personal tin, e sistema di e vervroedge uittreding (VUT) cu ta yuda baha gasto, bayendo den fase cu naturalmente no ta di un dia pa otro.
Mirando e situacion actual, no ta faborabel un aumento ni un peso di belasting den cualkier forma cu kier introducie. Tin di evalua tur cos miho prome cu tuma paso.
Turista ta drentando! Placa ta drenta y esaki referiendo na relato di gobierno caminda ta remarca cu a haya mas di 800 miyon di belasting, cu ta nifica cu ta confirma cu comercio y pueblo ta pagando su belasting y ta momento awo pa gobierno mustra kico tur ta haci cu e placa aki tambe.
