Ainda por corda con riba un 21 di September 2018 casi mey anochi a tuma lugar un tiramento na Shiribana na Paradera. Dos homber riba brommer a para un adres conoci pa Polis y asina los tiro riba un homber den cura di cas. E homber a logra core bay den cura di un bisiña otro banda di caminda. Hendenan a bati alarma pasobra a mira kico a pasa y tabata tras di e brommer. Unidadnan di Polis e dia ey a topa cu e brommer den Tanki Leendert.
A persigui e brommer y e dos hombernan a logra scapa core bay na pia despues den mondi. Aunke a hasi un buskeda grandi, tog no a topa cu nan. Henter e marduga di dia 22 di September a keda busca sin haya nada. E mesun anochi despues di e persecusion a drenta informacion di e persona herida den e veranda di e cas na Shiribana. Polis a yega y pidi ambulance cu urgencia. A hiba e persona herida pa Hospital cu perforacion. E tabata na tino. A splica Polis kico a sosode cune. Asina a logra haya sa tambe kende tabata e autornan. Pa dia 24 di September mes a logra hasi e prome detencion. Aki tabata trata di Chandrik Maduro di 20 aña. E cos tin di haber cu problema bieu cu a termina na tiramento. Recherche di Noord no a sosode. A sigui busca pa e otro persona riba e brommer.
E tabata un Colombiano illegal fam Flores Mejia. El a logra pasa pasco y aña nobo pafo di prison. Aña a bolter y autoridad a busca su drechi. Asina a drenta dos diferente adres. Un di nan tabata na Pavia. A haya tip cu e ta kedando eynan. Despues di bishita dos adres sin haya nada, e Colombiano illegal mes a sinti cu nan ta hopi cerca di dje y cu cos ta serio. E mesun atardi laat pa anochi el a entrega su mes. Awor ambos sospechoso den tiramento riba brommer na Shiribana ta tras di trali. E arma si autoridad no a logra pone man riba dje. Awor aki ta cuestion di caba cu e proceso di interogacion pa nan presenta den corte. E victima mes ta afo caba y ta sigui su bida.
