Colegio EPI y Qredits Microfinanciering Nederland (Aruba) ta informa cu entrante 1 di februari, 2021 ta cuminsa cu e programa BeYourOwnBoss cu un duracion di 18 siman.
Nos ta bibando den e era di Empresario Independiente!
Empresario independiente y e mentalidad empresarial (entrepreneurship) ta un habilidad esencial di siglo 21 cu ta altamente considera na nivel mundial como vital pa e recuperacion, crecemento y vitalidad di cada economia local mey mey di e crisis actual. Segun cu companianan ta reconfigura nan mes pa competi den e economia di innovacion, e magnitud di oportunidadnan pa tur empresario ta crece.
Consciente di e tendencia importante aki, Colegio EPI y Qredits Microfinanciering Nederland (Aruba) ta cuminsa entrante 1 di Februari, 2021 cu e programa BeYourOwnBoss cu un duracion di 18 siman. Un total di 100 studiante di e sector Hospitalidad y Turismo na EPI lo ta e promer grupo cu lo participa y wordo certifica. Lo incorpora e programa di educacion acredita aki den e curiculo existente na e sector. Ya caba a incorpora e programa aki den e curiculo di mas di 100 scol na nivel MBO na Hulanda. E compromiso di Colegio EPI ta pa den e añanan cu ta bin pa sigui incorpora e certificacion aki den e curiculo di programanan existente y nobo pa tur studiante.
E auto-descubrimento y e aumento di oportunidad laboral ta e pilarnan di e progama di educacion y ta enfatisa e sentido empresarial independiente cu tambe ta un opcion pa e studiante den su futuro como profesional. E programa educativo BeYourOwnBoss no ta converti tur studiante den un empresario independiente, pero si e ta yuda tur pa ta prepara pa tin un mentalidad di un empresario, pa ta competente y pa keda atractivo den e mercado laboral di futuro. Tambe, companianan di futuro lo definitivamente beneficia di por conta cu e pensamento empresarial y di innovacion como parti di e capacidad di su recursonan humano.
Colegio EPI y Qredits Microfinanciering Nederland (Aruba), tambe ta kere den facilita educacion pa bida largo pa e comunidad di Aruba. Pa es motibo, tambe lo bay ofrece awor pa publico general e oportunidad unico di siña lo mas posibel tocante e sentido empresarial y con pa BeYourOwnBoss.
Lo ofrece e programa di educacion di 18 siman na publico general y lo cuminsa e di dos siman di februari 2021 cu un sesion di introduccion. Les mes lo cuminsa oficialmente e siman di februari 15 y lo caba na final di juni. Lo presenta e programa di educacion na e idioma Ingles y lo organisa e lesnan dos biaha pa siman di 6:30 – 9:00 p.m. na Colegio EPI den un forma di educacion combina tanto fisicamente como virtual. E costo di henter e programa ta Afls. 350,- pa persona y ta inclui tur material y acceso pa e portal virtual di educacion di BeYourOwnBoss. Na final, e participante lo ricibi un certificado na nivel profesional (MBO) como empresario di futuro cu ta inclui e creacion di su propio portafolio digital di empresario y e diseño di su modelo di negoshi. Esaki lo duna e participante automaticamente un posicion di bentaha na momento cu e dicidi di tuma e siguiente paso cu micro-financiamento hunto cu Qredits Microfinanciering Nederland (Aruba).
Participa den educacion pa bida largo door di adkiri e habilidadnan di siglo 21 y inverti den bo futuro!
Inscripcion pa publico ya caba ta habri pero limita. No perde e oportunidad aki! Pa inscribi y mas informacion por bishita e pagina di Facebook di Colegio EPI of di Qredits Microfinanciering Nederland (Aruba) uza e siguiente link: https://bit.ly/2KJr5ck.
