Cu gobierno ta pasa un presupuesto supletorio ta un procedura masha normal. Cu ta baha e presupuesto aproba na maart ta un bon desaroyo. Asina mes AVP a opta pa vota contra, pa motibo cu ta considera cu gobierno ta corta den salario di trahado enbes di e servicionan cu ta tuma di comercio.
Asina por ehempel ta nota cu Gobierno no a cancela contractnan di huur di edificio, bufete di abogadonan, coordinadornan y asina por sigui menciona. AVP ta sinti cu ey por spaar hopi placa pa luna enbes di yega corta den salario di empleadonan publico.
Daphne Lejuez, aunke a sostene e presupuesto supletorio, no por caba di compronde con un reunion cu mester a tuma entre 3 pa 4 ora, ta bay asina largo te yega 16 ora di debate, anto pornada.
Pa e partnernan den coalicion, e presupuesto ta duna nan poco rosea pa yega fin di aña. Gobierno a bin hay’e cu gastonan extra debi na Covid-19 cu a haci cu no por mantene e mesun presupuesto. Awor cu a haya aprobacion, por realisa pagonan necesario, cu sosten tambe di Hulanda y di e fiansa local cu a haci recientemente.
Na final a aproba e ley cu 12 voto na fabor y 6 contra. Tur 6 contra tabata di e parlamentarionan di AVP.
