Riba 18 october 2023, Dia Nacional contra Traficacion di Hende, Coordinatiecentrum Mensenhandel Mensensmokkel Aruba (CMMA) hunto cu Minister President di Aruba, Evelyna C. Wever-Croes, y Minister di Husticia y Asuntonan Social, Rocco Tjon, tabata present’e n’e première di e campaña.
Varios minister tabata presente n’e evento, como tambe miembronan di Parlamento, varios representante di varios departamento di Gobierno, NGO’s, International Organizations y demas stakeholder-y partnernan.
E evento ta forma parti di e campaña di conscientisacion ‘Habri bo Wowo’. Un storia cu ta relata e storia di Camila, un personahe cu a haya su mes den un situacion di contrabanda di hende y traficacion di hende den forma di explotacion laboral den un otro produccion na 2021. Den e storia Camila ta bira victima di traficacion di hende den forma di explotacion sexual via sexcams. Un produccion cu ta ilustra un forma moderno di traficacion di hende, unda cu un traficado ta manipula, gaña, y forsa un persona pa haci actonan sexual dilanti camara.
Den juni 2021, Coördinatiecentrum Mensenhandel Mensensmokkel Aruba (CMMA) a lansa e campaña nacional ‘Habri bo wowo’. E meta di e campaña ta pa conscientisa e pueblo di Aruba tocante e problematica di traficacion di hende, un crimen cu ta tuma luga na Aruba tambe.
Por sigui mas di e campaña riba www.cmmaruba.com y via social media (Facebook, Instagram), un pakete educacional pa scolnan secundario y informacion tocante siguridad online via e programa ‘No cai den trampa’.
