Desde 21 Maart Club Kibrahacha hunto cu CEDE Aruba y un grupo di NGO a inicia un linea di telefoon pa 60+. Club Kibrahacha ta encarga pa maneha e linea di telefoon 280-0505. E linea di telefoon ta gratis pa conversa pa 60+.
E linea di telefoon ta accesibel tur dia. E orario ta for di 08:00 mainta pa 08:00 di anochi.
Durante ultimo 6 siman e lina di telefoon gratis aki a sirbi pa nos grandinan keda den contacto y alavez haya informacion of guia durante e periodo di Covid-19.
E linea di telefoon ta sirbi tur 60+ na Aruba cu tin pregunta of kier solamente combersa. Nos grandinan a jama pa ayudo y informacion relata na diferente topiconan manera e estado di salud, e necesidad pa alimentacion, vivienda adecuado y transporte. Alavez e seguridad di nos grandinan tambe tabata un precupacion bou di nos grandinan.E team di voluntario a skucha nos grandinan y duna tur informacion of guia necesario pa esaki. Tin situacion na unda a dirigi of intermedia cu otro instancianan concerni. E manera di traha aki a duna nos grandinan e sentimiento di ser skucha y guia pa cu nan necesidadnan.
Recientemente Club Kibrahacha a forma un team di voluntario cu a registra via e plataforma pa voluntario di CEDE Aruba www.org.aw cu awor ta atende tambe cu nos grandinan cu kier keda den contaco cu un persona. E voluntarionan aki tin como tarea pa jama e persona di edad abase regular pa asina combersa of duna guia of sosten unda cu por.
Durante e ultimo siman por a constata cu tin un necesidad pa e servicio di telefoon pa nos grandinan na Aruba continua despues di e periodo di Covid-19. E telefoon 280-0505 ta gratis y orario ta di 08:00 am – 08:00 pm. Nos tin un team di voluntario hopi motiva pa scucha bo y guia bo.
