Diaranson mainta Minister Arends a reuni cu e directiva di Club Kibrahacha cu a bin duna nan informe anual. Datonan manera cantidad di miembro, nan edad y con nan ta transporta nan mes na e club a wordo comparti cu minister su team como tambe kico nan retonan mas grandi ta.
Pues parti di e motibo pa sinta cu otro ta pa explora con gobierno por yuda e instancia y con esaki por mehora e bienestar di nos grandinan en general.
Club Kibrahacha ta ocupa su mes cu actividadnan pa adultonan mayor y tin casi 300 miembro activo. Mayoria di nan programa, cu ta consisti di entre otro ehercicio fisico, manualidadnan y entretenimento, ta tuma luga na nan compleho na Piedra Plat. Nan ta habri cinco dia pa siman cu actividadnan den mainta y atardi.
E club cu ta operando for di aña 1985 ta fungi como un instancia importante pa combati diferente reto cu nos grandinan ta enfrenta manera isolacion, depresion y otro kebrantenan di salud. For di aña pasa april nan tin un number telefonico special pa atende cu adultonan mayor den soledad. E liña telefonico aki, cu ta wordo carga dor di boluntario, a mira un incremento den yamada diario desde cu e la cuminsa funciona.
Entre e metanan cu e club su directiva tin pa aña 2024 ta hisa e cantidad di miembro y voluntarionan. Cu ayudo di mas boluntario nan lo por habri tur dia den siman asina brindando mas atencion na nan miembronan. Adicionalmente, lo purba di busca mas adultonan mayor di e districto di San Nicolas cu ta unda cu tin mas hende di e demografico aki ta biba.
Minister Arends ta sumamente orguyoso di Club Kibrahacha su esfuersonan pa cu nos grandinan y ta gradici nan enormemente. E trabou cu nan ta haci siguramente ta uno di gran balor pa nos comunidad henter y tambe ta uno cu no ta facil. Ministerio di Asuntonan di Adulto Mayor lo percura pa mantene un colaboracion di cerca cu e club pa asina por yega na e metanan comun.
