Diaranson mainta Polisnan mester a acudi na un cas na Meiveld pa un caso di robo. Un persona atrapa “con las manos en la masa”.Un cabayero a bay haci un pool limpi na un cas na Meiveld.
El a staciona su auto dilanti di e cas, cu ta keda banda di Samba. Ora cu el a bolbe bek na e pick-up, a ripara cu su celular marca Samsung a disparce den cuestion di minuut. Den e investigacion cu a sigui, a resulta cu e homber Randall Wolff a cay pa tentacion. E adicto aki tabata canando bayendo SAMBA y pasando banda di e pick-up el a mira e celular poni riba e asiento y no por a wanta su mes. El a pasa man cu e celular y a sigui su caminda pa su curso di rehabilitacion na SAMBA.
Mientrastanto e trahado, a yama Polis. A resulta cu na e cas banda di SAMBA tin camaranan di siguridad. Ora cu a draai esaki bek, por a mira claramente con e homber aki, bisti cu e flanel cu strepi ta cana pasa (cu un rugtas cun’e) y despues ta hinca man den e auto coy e celular. Polisnan a dicidi di consulta un rato cu nan hefenan pa mira esaki por wordo considera ainda “op heterdaad” pa detene mesora y despues cu nan a haya confirmacion di esaki, mesora a bay na SAMBA y areste. No a hay’e cu e celular y a pensa cu e lo a sconde algun caminda den e instalacionnan di e luga aki. A confisca su tas tambe. E trahado a entrega keho tambe y investigacion ta sigui.
