Aruba, sea orguyoso di bo yiu di tera, Clayton Raven. Cu apenas 26 aña di edad a pone Aruba su nomber briya den mundo di Boxeo Internacional na Alemania.
Diasabra anochi Clayton a bringa den e evento grandi na Alemania yama Enfusion. El a bringa p’e titulo “Faha”. El a bringa den e “Co Main Event” y un biaha mas e ta logra sali campeon. El a logra esaki den apenas dos rond.
Mester remarca cu Clayton Raven ta den un racha agresivo den tur su cuater ultimo peleanan den cual tur cuater el a sa di gana. Su impresionante record ta 13 gana 3 perdi, 10 TKO/ KO (technical knockout/knockout).
Sin duda cu Aruba mester ta super orguyoso di nos hoben boxdo, Clayton Raven, kende cada biaha e mester subi avion pa e biaha pa oranan largo pa yega Alemania. El a yega cu jetlag y cu hopi preparacion tanto mental como fisico, hopi curashi y perseverancia ta subi ring pa TKO un boxdo di Bosnia den apenas dos rond.
Un biaha mas nos orguyo y glorioso bandera di Aruba a gosa di un respet mundial den e mundo interesante di boxeo.
Aruba ta chikito den tamaño, pero grandi den curashi. Un biaha mas ta demostra cu perseverancia y trabou duro, tin su recompensa.
Di parti Headlines Group, cas editorial di 24ora.com y TREMPAN, un pabien grandi na Clayton Raven. Un pabien tambe na su motor incansabel Gilbert Raven y henter su team!
