E ciudadano Mariska Fingal, den un denuncia haci publicamente via di 24ora.com, ta papia di cierto actonan cu a tuma luga na Departamento di Obranan Publico (DOW), cu ta trece hopi duda cerca dje.
El a splica cu na momento cu el a bolbe di Hulanda, el a hay’e den un situacion cu tabata hopi dificil pa haya tereno pa cual a dicidi di cumpra un tereno na 1997. A cumpra dos tereno pa haci un inversion. “E tereno aki a duna nos hopi dolor di cabez” sra. Fingal a cuminsa pa splica.
E tereno cu e ta papiando di dje, dado momento el a dicidi di bende, pa motibo di su salud, na 2019. Pa su sorpresa, ora cu e persona na kende a bende e tereno a bay DOW, nan a inform’e cu e tereno ta “afgekeurd”. Esaki, segn sra. Fingal, a lague sorprendi. El a cumpra e tereno cu un mapa, cu tabata aproba, door di Elvis Gomez y DOW. P’esey e no por compronde di con awo di repente e tereno ta “afgekeurd”.
E ta bisa cu si berdad Gobierno kier e tereno pa motibo di e rooi cu ta pasa eybanda, anto ta na su luga pa nan pague loke el a inverti den e tereno, cual a wordo cumpra cu un mapa aproba door di Gobierno. Tampoco e no ta compronde con Gobierno por para benta di e tereno cu ta di dje. SI ta par’e anto mester pague loke el a paga p’e na 1997.
Den un aña di tempo nan a bin ta mand’e di kasha pa muraya. A tuma contacto y manda carta pa diferente Minister y ainda e no a haya un solucion, mientras cu e mester di e placa pa busca su salud. “Loke mi kier ta un solucion, pa Marlon (Croes) stop di gaña pueblo. Marlos sa cu el a kita e tereno y e mester sa e motibo pakico el a kita e tereno. Ami a paga placa pa e tereno, mi no a hay’e gratis. Mi kier mi placa bek. Mi ta kere cu e Ministernan no por pasa kico ta pasando, sino nan lo a actua di un manera husto,” el a bisa.
Te ainda e no a papia directamente cu ningun minister, solamente cu funcionarionan. “Mi kier un solucion pa mi haya mi placa. Mi kier bende e tereno pa mi busca mi salud.” Y a agrega cu “awo cada biaha mi tin cu presta placa pa busca mi salud. Si mi mester cana caminda di Corte, mi lo hacie.”
Ta trata di un tereno eigendom di 1000M2.
